Qazaqstan Mıanma úkimetin rohındja-musylmandardyń máselesin sheshýge shaqyrdy
Bul týraly Qazaqstannyń Birikken Ulttar Uıymy janyndaǵy Turaqty ókili Qaırat Omarov BUU Qaýipsizdik Keńesiniń Mıanmadaǵy ahýal boıynsha ótken otyrysynda málimdedi. Kezdesý barysynda BUU Bas hatshysy Antonıý Gýterrısh jáne BUU Bosqyndar isi jónindegi agenttiginiń izgi nıetti elshisi, aktrısa Keıt Blanshett Mıanmadaǵy rohındja-musylmandarynyń jaǵdaıy týraly baıandamalaryn jasady.
Qazaqstan Elshisi dál osydan bir jyl buryn halyqaralyq qoǵamdastyq Mıanmadan Bangladeshke 700 myńnan astam rohındja-musylmandardyń qashyp ketken eń iri gýmanıtarlyq apattardyń birine kýá bolǵanyn atap ótti.
«Eń tańqalarlyǵy-rohındja-bosqyndardyń 60%-y - úılerinen ketýge májbúr bolǵan jáne biz sáýir aıynda Bangladeshte ózimiz kórgenimizdeı bosqyndar lagerlerinde óte qıyn jaǵdaıǵa tap bolyp otyrǵan balalar», - dedi Q.Omarov.
Qazaqstan BUU jáne barlyq gýmanıtarlyq áriptesterdiń rohındja-bosqyndarǵa azyq-túlik, baspana, dári-dármekter, sý jáne basqa da kómek kórsetý quraldaryn usynýǵa baǵyttalǵan kúsh-jigerin joǵary baǵalaıdy.
Ústimizdegi jyldyń sáýir aıynda Qazaqstan Úkimeti Bangladeshtegi Koks-Bazar qalasynyń mańyndaǵy aýmaǵynda ornalasqan rohındja-bosqyndarǵa 500 myń dollar kóleminde gýmanıtarlyq kómek kórsetip, ony olar turatyn jerlerge jetkizdi.
Mıanmada qazirgi jaǵdaı týraly aıta kelip, Q.Omarov BUU-nyń málimetteri boıynsha etnıkalyq rohındja halqy ókilderiniń júrip-turý bostandyǵyna, sondaı-aq bilim alý, densaýlyq saqtaý jáne ómirlik daǵdylaryna qol jetkizýge qatań shekteýler áli qalýda ekenin atap ótti. «Rohındja-bosqyndar kepildikti qaýipsizdikti jáne osy máseleler boıynsha naqty progresti kórip turǵan kezde ǵana olar elge oralady», - basa aıtty Qazaqstan elshisi.
Qazaqstannyń Turaqty ókili sondaı-aq Mıanmadaǵy Rohındja halqynyń quqyqtaryn buzýshylyqtardy tergeý boıynsha táýelsiz komıssııa qurýyn tatýlastyqqa jáne ótpeli ádilettilikke baǵyttalǵan negizgi qadamdardyń biri retinde atady. Sonymen qatar, ol Komıssııaǵa musylman qaýymdastyǵynyń ókilin qosý onyń bedelin edáýir arttyryp, «kópirlerdi salýǵa» kómektesýge múmkindik bere alatyndyǵyn atap ótti.
Jalpy, BUU Qaýipsizdik Keńesiniń músheleri rohındja-bosqyndardyń problemalaryn Mıanmadaǵy burynǵy turǵylyqty jerlerge qaýipsiz, qaıyrymdy jáne óz erkimen oralýy úshin tez arada sheshý qajettigi týraly biraýyzdy boldy.
Aıta keteıik, Qazaqstan tarapy rohındjalyq 626 myń bosqynnyń taǵdyryna alańdaýshylyq bildirip, gýmanıtarlyq kómek joldaǵan bolatyn.