Qazaqstan Logıstıkanyń tıimdilik ındeksinde 6 pozıtsııaǵa kóterildi

NUR-SULTAN. QazAqparat – Qazaqstan Logıstıkanyń tıimdilik ındeksinde 6 pozıtsııaǵa kóterildi. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Roman Sklıar aıtty, dep habarlaıdy QazAqparat tilshisi.

«LPI reıtıngisi boıynsha, 2018 jyly Qazaqstan Logıstıkanyń tıimdilik ındeksinde 2016 jylmen salystyrǵanda 6 pozıtsııaǵa kóterildi, álemniń 160 memleketi arasynda 71-oryndy ıelendi», - dedi ol.

Mınıstrdiń dereginshe, sońǵy eki jylda Qazaqstan pozıtsııasy jetkizý merzimin saqtaý boıynsha – 50 orynǵa (42 pozıtsııaǵa), keden jumysynyń tıimdiligi – 65 orynǵa (21 pozıtsııaǵa), logıstıkadaǵy kompetentsııa – 90 orynǵa (2 pozıtsııaǵa) kóterilip, kórsetkishterin jaqsartqan.

«Qazaqstan pozıtsııasynyń jaqsarýyna kedendik deklaratsııaǵa ketetin ýaqyt shyǵyndarynyń qysqarýy, kedendik jáne salyqtyq ákimshilendirý boıynsha avtomattanǵan júıe arqyly elektrondyq deklaratsııany engizý áser etti. «Nurly jol» memlekettik baǵdarlamasy aıasynda baqylaý pýnktterin jańǵyrtý, aqparattardy elektrondyq aldyn-ala engizý josparlanǵan. Bul reıtıngke oń áser etedi», - dedi Roman Sklıar.