Qazaqstan Lıvanǵa tórtinshi bitimgerler tobyn jiberdi

NUR-SULTAN. QazAqparat - Búgin qazaqstandyq áskerı qyzmetshiler toby Lıvanǵa bitimgershilik mıssııalaryn atqarýǵa attandy. Bul týraly QazAqparat tilshisi Qorǵanys mınıstrliginiń baspasóz qyzmetine silteme jasap habarlaıdy.

Bul «Lıvandaǵy BUU-nyń Ýaqytsha kúshteri» mıssııasynyń quramynda qyzmet atqarýǵa bara jatqan tórtinshi bitimgerler toby. Óńirlik qolbasshylyqtar men desanttyq-shabýyldaý áskerleriniń áskerı qyzmetshileri 2019 jylǵy qarashadan beri Lıvanda bolǵan qazaqstandyqtardy aýystyrady.

«Qazaqstan Qarýly Kúshteriniń bitimgershilik qyzmeti – bul halyqaralyq áskerı yntymaqtastyqtyń damýymen qatar áskerı qyzmetshiler úshin baǵa jetpes tájirıbe. Mıssııaǵa qatysý halyqaralyq qaýipsizdikti nyǵaıtýǵa yqpalyn tıgizedi jáne halyqaralyq qoǵamdastyqtaǵy jaýapty múshesi retinde Qazaqstan týraly oń ımıdjdi qalyptastyrady. Sizderdiń elimizden jyraqta júrseńizder de óz mindetterińizdi abyroımen oryndaıtyndaryńyzǵa senemin», – dep Desanttyq-shabýyldaý áskerleriniń qolbasshysy general-maıor Qanysh Ábýbákirov bitimgerlerge tilegin aıtty.

Burynǵydaı, qazaqstandyq áskerı qyzmetshiler jarty jyl boıy Lıvan Respýblıkasyndaǵy úndi bitimgershilik batalony quramynda bolady. Bitimgerler jergilikti aýmaqty patrýldeý, azamattyq turǵyndarǵa kómek kórsetý, baqylaý beketterin uıymdastyrý jáne mıssııa shtabynyń basqa da sharalaryna qatysatyn bolady. Kún saıyn qazaqstandyq jáne úndi bitimgerler 50-den kem emes tapsyrma oryndaıdy.

Lıvanǵa attanatyn rota quramy dástúr boıynsha 120 adam quralǵan. Epıdemıologııalyq jaǵdaıdy eskere otyryp, jeke quramnyń densaýlyǵyn saqtaý maqsatynda áskerı qyzmetshilerdi jóneltý eki kezeńde - tamyz aıynyń basynda jáne ortasynda júzege asyrylady.

Bitimgerlerge qıyn klımattyq jaǵdaıda qyzmet etýlerine týra keledi, sondyqtan úmitkerler qatań irikteýden, medıtsınalyq komıssııadan, moraldyq-psıhologııalyq turaqtylyqtaryn tekserýge arnalǵan synaqtardan ótti. Bitimgershilik mıssııasynyń ofıtserleri men serjanttary aǵylshyn tilin jaqsy biledi, sonymen qatar Birikken Ulttar Uıymynyń bitimgershilikke qatysty negizgi qujattarynyń erejelerimen tanys.

Eske sala ketsek, Qazaqstannyń Lıvandaǵy bitimgershilik mıssııasy 2018 jyldyń qazan aıynda BUU-nyń mandatyna sáıkes Lıvanda qazaqstandyq jáne úndi bitimgerlerin birlesip óristetý týraly memorandýmǵa qol qoıylǵannan keıin bastaldy.