Qazaqstan Lıvanǵa 120 bitimgerdi baǵyttaıdy

ASTANA. QazAqparat - QR Qorǵanys mınıstriniń orynbasary Talǵat Muhtarov bitimgershilik rotanyń Lıvandaǵy mıssııaǵa daıyndyǵy týraly aıtyp berdi, dep habarlaıdy QazAqparat.

«Qazirgi kezde bizdiń bólimsheni bitimgerlik mıssııanyń birine baǵyttaý úshin aýqymdy daıyndyq jumysyn júrgizip jatyrmyz», - dep naqtylady mınıstrdiń orynbasary.

Onyń atap ótýinshe, Lıvanǵa shamamen 120 adam jiberiledi.

«Biz barlyq qajetti rásimderden óttik, endi keıbir standartty rásimder ǵana qaldy. Bul sharalardy BUU talap etip otyr. Kúzge qaraı rotany baǵyttaımyz. Aldyn ala jospar boıynsha olar Lıvandaǵy mıssııaǵa barady», - dedi T. Muhtarov.

Osy oraıda elimizde bitimgerlik qyzmet týraly tıisti zańnama qabyldanǵanyn eske salyp ótken T. Muhtarov: «Búginde BUU-men birlese jumys istep jatyrmyz. Lıvanǵa baryp, qyzmetti atqaratyn jermen tanysyp keldim. Bul bitimgerlik mıssııa beıbitshilikti qoldaýǵa negizdelgen», - dep túsindirdi.

Budan buryn habarlanǵandaı, bıyl qańtar aıynda QR Qorǵanys mınıstrligi «QazAqparat» HAA-ǵa sany rotaǵa deıin áskerı bólimsheni jiberý boıynsha jumystar júrgizilip jatqanyn málimdegen bolatyn. 

Qorǵanys mınıstrliginiń málimetinshe, «Qazbat» sapyna enýge nıettiler qatary qalyń kórinedi. Sondyqtan da irikteýdiń qatań tártibi bekitilgen. Osy oraıda densaýlyq jaǵdaıy, sporttyq daıarlyǵy, kásibı daǵdylary, tilderdi meńgerýi, psıhologııalyq turaqtylyǵy jáne basqa da jeke qasıetteri eskeriledi.




Foto: mod.gov.kz