Qazaqstan-Qytaı shekarasyndaǵy jaǵdaıǵa túsinik berildi

NUR-SULTAN. QazAqparat – Qazaqstan Respýblıkasynyń Syrtqy ister mınıstrligi eksporttyq taýarlary bar kólikterdi Qytaı aýmaǵyna ótkizýge shekteýge qatysty QHR-men kelissózder júrgizýde, dep habarlaıdy QazAqparat.

QR Qarjy mınıstrligi Memlekettik kirister komıtetinen málim etkendeı, pandemııa bastalǵaly Qytaı Qazaqstannan kiretin kólikter sanyn shektedi.

«Buryn «Nur Joly» baqylaý-ótkizý pýnkti arqyly Qytaı tarapyna kúnine 200-den astam kólik qatynap kelse, pandemııa bastalǵannan beri bul san kúnine 20-30 kólikke deıin tómendedi», - dedi komıtetten.

Atap ótilgendeı, bul máseleni sheshý úshin Qytaı tarapymen kelissózder júrgizilip, nátıjesinde táýligine 80 kólikke deıin ótkizile bastady.

«Alaıda bıylǵy 10 qarashadan bastap Qytaı qazaqstandyq taraptan qabyldanatyn kólikterdiń sanyn shektedi. Al eksporttyq taýarlary bar kólikter múldem ótkizilmeıdi. Máselen, aǵymdaǵy jyldyń 26 ​​qarashasynda Qytaı tarapy «Evrootranzıt« kóliktik-logıstıkalyq ortalyq aýmaǵynda qazaqstandyq kólikterge tıelgen júkteri bar 7 tirkeme ǵana shyǵardy. Osyǵan baılanysty, máseleni sheshý úshin Qazaqstan Respýblıkasynyń Syrtqy ister mınıstrligi QHR ýákiletti organdarymen kelissózderdi jalǵastyrýda», - dedi QR Qarjy mınıstrligi Memlekettik kirister komıtetinen.