Qazaqstan-Qytaı halyqaralyq júk avtotasymaly yntymaqtastyǵyna tyń serpin beriledi
QR Prezıdenti Qasym-Jomart Toqaevtyń taıaýdaǵy Qytaı Halyq Respýblıkasyna jasaǵan memlekettik saparynda eki eldiń úkimetteri halyqaralyq avtokólik tasymaly baǵytynda ózara áriptestikti damytý jónindegi kelisimge qol qoıǵan bolatyn.
Bul rette Qazaqstan men kórshiles eldiń arasynda osy saladaǵy alǵashqy kelisim 1992 jyly jasalǵanyn aıta keteıik. Arada 30 jylǵa jýyq ýaqyt ótkenin eskersek, atalǵan qujatty jańartyp, zaman talabyna saı beıimdeý qajet boldy.
Málimetterge súıensek, 2022 jyldyń qorytyndysy boıynsha ekijaqty júk tasymaly 65%-ǵa ulǵaıyp, 265 myń tonnaǵa jetken. Sondaı-aq qytaılyq júkterdiń tranzıttik tasymaly 2,6 esege ósip, 1,1 mln tonna kóleminde baıqaldy.
Al jańa kelisimge sáıkes júk tasymaly salasynda tsıfrly tehnologııalardy engizip, kólik qatynasyn jetildirý, ıaǵnı barys-kelisti retteý arqyly elder arasyndaǵy taýar tasymalynyń kólemin arttyryp, saýda-ekonomıkalyq ári kólik-logıstıkalyq baılanysty kúsheıtý kózdelgen.
Máselen, bul qujat boıynsha taraptar jyl saıyn belgilengen mólsherde ruqsat blankilerimen almasatyn bolady. Atalǵan qujat jolaýshylar jáne júk tasymalyn júzege asyrýǵa qajet. Kólik quraldaryna arnalǵan ruqsat qujattaryn tasymaldaýshylar kelisim jasasqan elderdiń jaýapty vedomstvolarynan nemese olarǵa baǵynyshty uıymdardan ala alady. Buǵan qosa múddeli taraptardyń ótinishine sáıkes ózara kelisim negizinde qosymsha mólsherde tasymaldaýǵa arnalǵan ruqsat blankilerimen almasý joldary qarastyrylǵan. Osy oraıda ruqsat blankileri quzyrly organnyń mórimen jáne ony bergen jaýapty tulǵanyń qolymen kýálandyrylýǵa tıis. Al elektrondy formattaǵy ruqsat qujatynda jaýapty tulǵanyń elektrondy tsıfrly qoltańbasy bolý qajet.
Bul oraıda berilgen ruqsat blankisin basqa tasymaldaýshylarǵa nemese bir qoldan ekinshi qolǵa ótkizip, almasyp júrýge tyıym salynatynyn eskerte keteıik. Atalǵan qujat tek bir saparǵa, sondaı-aq jalǵyz kólik quralyna ǵana jaramdy. Sonymen qosa ony kelesi jyldyń 31 qańtaryna deıin ǵana paıdalanýǵa bolady. Tirkemeli nemese jartylaı tirkemesi bar aralas úlgidegi kólikterge arnalǵan blankiler tartqysh júk kóligine beriletinin atap ótken jón.
Tıisti ruqsatty berý men ony paıdalaný túri, kólemi, tártibi jáne basqa da sharttary týraly sheshimdi osy kelisimniń 17-babyna sáıkes birlesip qurylǵan komıssııa qabyldaıdy.
Tutastaı alǵanda, joǵaryda aıtylǵan kelisim aspan asty elimen aradaǵy alys-beristi damytyp, halyqaralyq júk avtotasymalynyń tamyryna qan júgirtedi dep boljanyp otyr. Sondyqtan da eki memleket atalǵan sektordaǵy ózara tıimdi áriptestikti damytýǵa múddeli ári bul baǵyttaǵy birlesken jobalarǵa basymdyq bermek.