Qazaqstan Qyrǵyzstanǵa asyl tuqymdy mal jetkizý múmkindigin pysyqtaýǵa daıyn - AShM

ASTANA. QazAqparat – Qazaqstan men Qyrǵyzstan mal jáne ósimdik sharýashylyǵy salalarynda yntymaqtastyqty tereńdetýge múddeli. Bul týraly Aýyl sharýashylyǵy mınıstri Erbol Qarashókeev málimdedi, dep habarlaıdy QazAqparat vedomstvonyń baspasóz qyzmetine silteme jasap.

Qazaqstannyń Aýyl sharýashylyǵy mınıstrligi basshysynyń aıtýynsha, eki memlekettiń mal sharýashylyǵynda neǵurlym tyǵyz ekonomıkalyq kooperatsııany jolǵa qoıý, AÓK ónimderin óndirý men óńdeýdi birlesip damytý, sondaı-aq genetıkalyq materıal almasýda jáne tuqym saýdasyn damytýda úlken perspektıvalary bar.

«Biz Qyrǵyzstannyń tuqym naryǵynyń qatysýshylaryna jańa joǵary ónimdi suryptardyń tuqymdaryn jáne jemis-jıdek daqyldarynyń otyrǵyzý materıaldaryn óndirý jáne satý máselesin qarastyrýǵa daıynbyz. Sondaı-aq, veterınarııa jáne fıtosanıtarııa, aýyl sharýashylyǵy ósimdikteriniń genetıkalyq materıaldarymen almasý salasynda ózara tıimdi ekijaqty yntymaqtastyqty belsendi damytý nıetimiz bar», - dedi Erbol Qarashókeev.

Sonymen qatar, taraptar agroónimniń ózara saýda kólemin ulǵaıtýdy kózdep otyr. Atap aıtqanda, Qazaqstan aýyl sharýashylyǵy janýarlaryn áketýge shekteýlerdi alyp tastaǵannan keıin, Aýyl sharýashylyǵy mınıstrligi asyl tuqymdy maldy, sondaı-aq asyl tuqymdy materıaldy Qyrǵyzstanǵa jetkizý múmkindigin pysyqtaýǵa daıyn.

Aıta keteıik, Qazaqstan men Qyrǵyzstan arasyndaǵy aýyl sharýashylyǵy ónimderiniń taýar aınalymy 2022 jyldyń 8 aıynyń qorytyndysy boıynsha 9%-ǵa ósip, 159,9 mln teńge boldy. Qazaqstan negizinen jumyrtqa, sút ónimderi, un, makaron ónimderi, shokolad jáne kondıterlik ónimder eksporttaıdy. Al, Qyrǵyzstannan sút ónimderi men alkogolsiz sýsyndardy ımporttaıdy.

Elimizge sapary aıasynda mınıstr Asqarbek Jánibekov Almatydaǵy birneshe sharýa qojalyqtaryna baryp, óndiristik protsestermen tanysty.