Qazaqstan, Qyrǵyzstan, Túrikmenstan men Ózbekstan fýtboldan týrnır ótkizip turýǵa kelisti

BІShKEK. KABAR-QazAqparat – Ystyqkólde 18 shilde kúni Qyrǵyzstan, Qazaqstan, Túrikmenstan men Ózbekstan fýtbol qaýymdastyǵy basshylarynyń kezdesýi ótti. Bul týraly Qyrǵyz fýtbol odaǵynyń baspasóz qyzmeti málimdedi, dep habarlaıdy QazAqparat «Kabar» agenttigine silteme jasap.

Oǵan Qazaqstan fýtbol federatsııasynyń prezıdenti Ádilet Bármenqulov, QFO prezıdenti Mederbek Sydyqov, Túrikmenstan fýtbol federatsııasynyń prezıdenti Arslan Aınazarov pen Ózbekstan fýtbol qaýymdastyǵynyń vıtse-prezıdenti Ravshan Irmatov qatysty.

Taraptar yntymaqtastyqty nyǵaıtý josparyn, ortaq jobalardyń negizgi máseleleri, ınfraqurylym, kadr áleýetin arttyrý men qarjylandyrýdy qamtamasyz etý máselelerin talqylady. Halyqaralyq dárejedegi týrnırlerdi birge uıymdastyrý, onyń ishinde túrli jas sanatyndaǵy komandalardyń álem birinshilikterin uıymdastyrý múmkindigin qarastyrdy.

«Taraptar bir-birine jan-jaqty qoldaý kórsetýge daıyn, onyń ishinde aqparat jáne tájirıbe almasý da bar. Kezdesý barysynda qaýymdastyq jetekshileriniń bári seriktestikti jańa dárejege jetkizýge nıetti ekenderin bildirdi», - dep málimdedi QFO-dan.

Kezdesý qorytyndysy boıynsha, Ortalyq Azııadaǵy túrkitildes elderdiń fýtbolyn damytatyn jumys tobyn qurý týraly hattamaǵa qol qoıý sheshimi qabyldandy.