Qazaqstan–Qyrǵyzstan saýda kólemin 2 mlrd dollarǵa jetkizýge kelistik – Qasym-Jomart Toqaev

BІShKEK. QazAqparat - Qazaqstan men Qyrǵyzstan Prezıdentteriniń shaǵyn jáne keńeıtilgen quramdaǵy kelissózderinen keıin ótken brıfıngi barysynda Qasym-Jomart Toqaev eki el de kópjaqty yqpaldastyqty jańa deńgeıge kóterýge múddeli ekenin aıtty, dep habarlaıdy QazAqparat Aqordaǵa silteme jasap.

«Birqatar ýaǵdalastyqqa qol jetkizdik. Biz saýda-ekonomıkalyq baılanystardy nyǵaıtýǵa basa mán berdik. Qazir álemdegi ahýal kúrdeli ekenin bilesizder. Osyndaı qıyn kezeńde kúsh jumyldyrý óte mańyzdy. Qazaqstan – Qyrǵyz eliniń negizgi saýda jáne ınvestıtsııa salasyndaǵy seriktesiniń biri. Byltyr ózara taýar aınalymy 1 mlrd dollarǵa jetti. Qazaqstan sońǵy 15 jylda qyrǵyz eline 1 mlrd dollardan astam tikeleı ınvestıtsııa quıdy. Onyń ishinde áleýmettik mańyzy zor jobalar da bar. Jalpy, ekonomıkalyq yqpaldastyqty odan ári órkendetýge áleýetimiz jetedi. Biz saýda kólemin jaqyn arada 2 mlrd dollarǵa jetkizýge kelistik», – dedi Qasym-Jomart Toqaev.

Buǵan deıin habarlaǵanymyzdaı, Qasym-Jomart Toqaev resmı saparmen Qyrǵyzstanǵa bardy.

Qyrǵyzstan Prezıdenti «Aq keme» mármár shatyrynda Qasym-Jomart Toqaevty resmı qarsy aldy.

Qazaqstan men Qyrǵyzstan Prezıdentteri shaǵyn quramda kelissóz júrgizdi.

Shaǵyn formatta ótken kezdesýden keıin eki memlekettiń resmı delegatsııalarynyń qatysýymen keńeıtilgen quramda kelissóz júrgizdi.

Qazaqstan Prezıdentiniń Qyrǵyzstanǵa sapary barysynda birqatar qujatqa qol qoıyldy.

Qasym-Jomart Toqaev pen Sadyr Japarov BAQ ókilderi úshin brıfıng ótkizdi.