Qazaqstan qyrǵyz naryǵyna 17,5 mln dollardyń taýaryn eksporttaıdy

NUR-SULTAN. QazAqparat – Bishkektegi Qazaqstan saýda-ekonomıkalyq mıssııasynyń (SEM) jumysy aıaqtaldy, dep habarlaıdy QazAqparat QR Saýda jáne ıntegratsııa mınıstrliginiń baspasóz qyzmetine silteme jasap.

Vedomstvo málimeti boıynsha, Qyrǵyzstanǵa elimizden tuz, un, makaron, syra, alkogolsiz sýsyndar, kondıterlik jáne sút ónimderin jetkizý jóninde 6 eksporttyq kelisimshart jasaldy. Kelisimsharttardyń jalpy somasy - 17,5 mln AQSh dollary.

Qazaqstan-Qyrǵyz bıznes-forýmyna, SEM jáne V2V kelissózderine Qyrǵyzstannyń 100-den astam ımporttaýshy jáne óndirýshi kompanııasy ókil boldy. Elimizden tamaq ónerkásibi, metallýrgııa, logıstıka, mashına jasaý, farmatsevtıka, hımııa ónerkásibi salalarynda jumys isteıtin taýar óndirýshiler men qyzmet kórsetýshi 20 kompanııa qatysty.

Qazaqstan Qyrǵyzstannyń negizgi saýda-ekonomıkalyq seriktesteriniń úshtigine kiredi. Eki el arasyndaǵy taýar aınalymy 2021 jyly - 970,8 mln AQSh dollary boldy, bul 2020 jylmen (848,6 mln AQSh dollary) salystyrǵanda 14,4%-ǵa kóp. Qyrǵyzstanǵa shyǵarylatyn eksport 7,6%-ǵa ósip, 625,2 mln AQSh dollaryna jetti.

«Qazaqstanda qyrǵyz kapıtalynyń qatysýymen 247 birlesken kásiporyn tirkelgen. Negizinen, kásiporyndar kóterme jáne bólshek saýda, qurylys, avtomobıl satý, aýyl sharýashylyǵy, jeńil ónerkásip salalarymen aınalysady.

Qyrǵyzstanda qarjy qyzmeti, tamaq ónimderin óndirý, saýda, avtomobılderdi jóndeý, kólik jáne baılanys, qurylys sııaqty salalarda qazaq kapıtalynyń qatysýymen 334 birlesken kásiporyn tirkelgen. Qyrǵyzstanǵa salynǵan tikeleı qazaqstandyq ınvestıtsııalar kólemi 1 mlrd dollardan asty», - dep habarlady QR Saýda jáne ıntegratsııa mınıstriniń orynbasary Qaırat Tórebaev Qazaqstannyń saýda-ekonomıkalyq mıssııasy aıasynda sóılegen sózinde.

Buǵan deıin habarlanǵandaı, Qazaqstannyń AQSh-qa taýar eksporty ósýi múmkin.