Qazaqstan qyrǵyz kondıterlik ónimderin ákelýge qoıylǵan shekteýdi alyp tastady

ASTANA. QazAqparat - QR Densaýlyq saqtaý mınıstrligi Qoǵamdyq densaýlyq saqtaý komıteti Qyrǵyzstan Respýblıkasynyń kondıterlik ónim óndirýshilerdiń ónimderin Qazaqstanǵa ákelýine jáne satýyna qoıylǵan ýaqytsha shekteýdi alyp tastady, dep habarlaıdy «QazAqparat» HAA vedomstvonyń baspasóz qyzmetine silteme jasap.

«Kondıterlik ónimderdi ákelýge jáne ótkizýge tyıym salý boıynsha ýaqytsha sanıtarııalyq sharalardy engizý týraly» Qazaqstan Respýblıkasynyń Bas memlekettik sanıtarııalyq dárigeriniń qaýlysyn joıý úshin Qyrǵyz Respýblıkasy Densaýlyq saqtaý mınıstrliginiń «Kýlıkovskıı» kondıterlik úıi» kásipornyna qatysty qajetti sharalardy qabyldaý jáne sanıtarııalyq-epıdemııaǵa qarsy is-sharalardy júrgizý týraly habarlamasy, sondaı-aq Keden odaǵynyń tehnıkalyq reglamentteri talaptaryna sáıkes keletin kondıterlik ónimderge júrgizilgen zerthanalyq zertteýler nátıjeleri negiz boldy», - delingen komıtettiń habarlamasynda.

Atalyp ótilgendeı, sáıkes kelmeıtin ónimderdiń qaýpin azaıtý maqsatynda komıtet joǵaryda atalǵan kásiporynnyń ónimderin engizý barysynda qaýipsizdikti qadaǵalaýdy jalǵastyrady. Bul shara Eýrazııalyq ekonomıkalyq komıssııa keńesiniń tıisti sheshimimen retteletin zerthanalyq baqylaýdy kúsheıtý sheńberinde júzege asyrylady.

«Baqylaýdyń osy túri ýaqytsha sanıtarııalyq sharalarǵa balama bolyp tabylady jáne kondıterlik ónimderdi Qazaqstannyń tutyný naryǵyna ákelýge jáne ótkizýge bolatyndyǵyn bildiredi», - delingen mátinde.