Qazaqstan qutqarýshylaryn aparǵan bortpen Túrkııadaǵy 16 qazaqstandyq elge qaıtady

ASTANA. QazAqparat – Qazaqstan qutqarýshylaryn aparǵan bortpen Túrkııadan 16 qazaqstandyq jáne 2 Qyrǵyz Respýblıkasynyń azamaty Astanaǵa jetkiziledi. Syrtqy ister mınıstriliginiń resmı ókili Aıbek Smadııarov BAQ ókilderimen ótken brıfıngide osyndaı derek aıtty, dep habarlaıdy QazAqparat tilshisi.

«Osy bortpen elge qaıtýǵa nıet bildirgen birqatar azamattarymyzdy Qazaqstanǵa ákelý josparlanyp otyr. Atap aıtqanda, saǵat 15:00-degi jaǵdaı boıynsha, 18 adam elge qaıtýǵa nıet bildirdi. Qazaqstannyń 16 azamaty jáne Qyrǵyzstannyń 2 azamaty bar. Atalǵan bort Astanaǵa keledi dep kútilip otyr. Ushý ýaqyty qosymsha habarlanady», - dedi Aıbek Smadııarov.

Eske salsaq, Túrkııanyń ońtústik-shyǵysynda bolǵan zilzaladan qaza tapqandar sany 2 921 adam ekeni habarlanǵan edi. Sońǵy derekter boıynsha, apatan zardap shekkender sany 3 419-ǵa jetken.

Búgin tańerteń Qazaqstan TJM 41 qutqarýshysy apat saldaryn joıýǵa kómek kórsetý úshin Túrkııaǵa jetti.

Qazirgi tańda Túrkııada qalǵan Qazaqstan azamattaryn Gazıantep qalasynan elge áketý sharalary júrgizilip jatyr. Elge qaıtamyn degen Qazaqstan azamattary 7 aqpan saǵat 12:00-de Gazıantep qalasynyń áýejaıynda tıisti protsodýradan ótip, daıyn bolýy tıis. Sonymen qatar, Qazaqstanǵa oralýǵa nıetti azamattar tizimin jasaý úshin [phone], [phone] telefon nómerlerine habarlasýy kerek.

Aıta ketsek, Qazaqstan Aýyl sharýashylyǵy mınıstrligi Túrkııadaǵy jaǵdaıǵa baılanysty azyq-túlikpen gýmanıtarlyq kómek kórsetýge daıyn ekenin málimdedi.

Foto: gov.kz