Qazaqstan qutqarýshylary Túrkııada medıtsınalyq kómek kórsetý pýnktin ashty

GAZIANTEP. QazAqparat - Qazaqstan Tótenshe jaǵdaılar mınıstrliginiń dárigerleri Túrkııa Respýblıkasynyń Gazıantep qalasynda medıtsınalyq kómek kórsetý pýnktin ashty, dep habarlaıdy QazAqparat.

TJM-niń baspasóz qyzmetinen málim etkendeı, joıqyn jer silkinisinen keıin izdestirý-qutqarý jumysyn júrgizý úshin Túrkııaǵa jiberilgen Qazaqstan qutqarýshylarynyń quramynda Apattar medıtsınasy ortalyǵynyń mamandary bar.

Dárigerler alǵashqy medıtsınalyq-sanıtarlyq kómek kórsetý úshin pnevmokarkasty modýl ornatty. Ol – turǵyndarǵa bilikti kómek kórsetýge arnalǵan dalalyq medıtsınalyq pýnkt. Qabyldaýdy apattar medıtsınasynyń bilikti dárigerleri júrgizýde.

«Gazıantep qalasynyń turǵyndaryn táýlik boıy qabyldaý barysynda Apattar medıtsınasy ortalyǵynyń dárigerleri – jıyrmaǵa jýyq naýqasqa, olardyń ishinde eki balaǵa konsýltatsııalyq jáne bilikti medıtsınalyq kómek kórsetti. Adamdar osy pýnktke kóbinese jylynýǵa, týystary men jaqyndaryn qutqarýshylar taýyp alǵansha kútýge keledi. Óıtkeni kópshiligi baspanasyz qaldy.

TJM pnevmokarkas modýlderin ótken jyly satyp alǵanyn atap ótken jón. Atalǵan dalalyq medıtsınalyq gospıtal iri zilzalalar men apattar týyndaǵan kezde ornalastyrýǵa arnalǵan. Mundaı mobıldi aýrýhana tolyq ornalastyrylǵan kezde kúnine 200-ge jýyq zardap shekken adamdy qabyldaı alady.

Óz ómirin qaýip-qaterge tigip Túrkııadaǵy zilzala ornynda aýyr jaǵdaıda qyzmet atqaryp jatqan qutqarýshylardyń da densaýlyǵyn saqtaý TJM medıtsına qyzmetkerleriniń basty mindetteriniń biri. Dárigerlerdiń aıtýynsha, búgingi kúni Túrkııadaǵy TJM jeke quramynyń densaýlyǵy jaqsy, olar psıhologııalyq turǵydan saý», - delingen mınıstrlik málimetinde.

Eske salaıyq, Qazaqstan qutqarýshylary mingen bort 7 aqpan kúni Gazıantepke attanǵan bolatyn. Mamandarymyzdyń ekinshi toby 8 aqpanda keshqurym jetti.

Túrik elinde zilzala kezinde joǵalyp ketken birneshe qazaqstandyq tabyldy. Onyń biri – Sabına Mamadıarova 8 aqpan kúni úıindi astynan aman shyǵaryldy.

Hataıda jumys istep jatqan qazaqstandyq qutqarýshylar Ádil Qadirbekovtiń óli denesin tapty. Kóp uzamaı Mırbolat Qurmashevtiń denesi de qırandy astynan tabyldy.

6 aqpanda Túrkııada bolǵan joıqyn zilzaladan qaza bolǵandar sany sońǵy málimetke sáıkes, 20,2 myńnan asty, taǵy 80 myńnan astam adam zardap shekti.

QR TJM búgin málim etkendeı, qazaqstandyq qutqarýshylar búginge deıin úıindiler astynan 26 adamdy alyp shyqty, olardyń jeteýi - aman.