Qazaqstan qutqarýshylary Aýǵanstandaǵy jumystardy aıaqtady

<p>Memleket basshysy Qasym-Jomart Toqaevtyń tapsyrmasy boıynsha Aýǵanstanǵa jiberilgen qazaqstandyq 45 qutqarýshy elge oralýǵa daıyndalýda, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a>.</p>

«Bólingen ýchaskedegi izdestirý-qutqarý jumystarynyń tolyq kóleminiń aıaqtalýyna baılanysty joıqyn jer silkinisiniń saldaryn joıýǵa kómek kórsetý úshin jiberilgen qazaqstandyq qutqarýshylar jasaǵyn qaıtarý sheshimi qabyldandy», – delingen Tótenshe jaǵdaılar mınıstrliginiń aqparatynda.

Málim etilgendeı, Aýǵanstanda qutqarý jumystary bastalǵannan beri Qazaqstan qutqarýshylary qaza tapqan 1 balanyń denesin alyp shyqty, jergilikti 80 turǵynǵa medıtsınalyq kómek kórsetti, 211 úı fragmentiniń úıindisin bólshektedi, Naıbrofı eldi mekenindegi qıraǵan 700 úıdiń ýchaskesin tekserip shyqty.

«Sonymen qatar qutqarýshylar qatty shańdy daýyldan qıraǵan shatyrly qalany tekserdi. Jergilikti bıliktiń ótinishi boıynsha qazaqstandyq qutqarýshylar men dárigerlerdiń jedel toby dıplomatııalyq korpýs ókilderimen birlesip 9 shatyrly qalashyqtyń ornalasý oryndaryn tekserdi», - dep naqtylady mınıstrlikten.

Qazaqstan TJM kúshteri men quraldaryn qaıtarý 14 qazanǵa josparlanǵan.

Eske salaıyq, 10 qazanda Qazaqstannyń 45 qutqarýshysy joıqyn jer silkinisiniń saldaryn joıýǵa kómek kórsetý úshin Aýǵanstanǵa attanǵan bolatyn. Alǵashqy táýlik ishinde 76 ýchaskedegi úıindi bólshektelgen bolatyn. Keıin qutqarýshylar úıindiler astynan 5-6 jasar balanyń máıitin alyp shyqty.

Sondaı-aq keshe, 11 qazan kúni Qazaqstan halqynyń atynan gýmanıtarlyq kómektiń alǵashqy legi tıelgen arnaıy ushaq Aýǵanstannyń Gerat áýejaıyna qonǵan bolatyn. Bul týraly oqıǵa ornynan Kazinform tilshisi Esimjan Naqtybaı habarlady.

7 qazan kúni Aýǵanstannyń batysyndaǵy Gerat provıntsııasynda 6,3 baldyq jer silkinisinen 2053 adam qaza taýyp, 9 myńnan astam adam jaraqat aldy.