Qazaqstan qurylys materıaldarynyń ımportyn 23 paıyzǵa azaıtady
«Búgingi tańda turǵyn jáne óndiristik ǵımarattardy, áleýmettik nysandardy, ınfraqurylymdardy salý kezinde negizgi materıaldardyń qurylys ónimderine naryqtyń suranysy 934 mlrd teńgeni quraıdy. Otandyq kásiporyndar 586 mlrd teńgege qurylys materıaldaryn óndirse, 348 mlrd teńgeniń ónimi (37%) ımporttalady. Naryq suranysyn qamtamasyz etý úshin 33 jańa joba iske asyrylýda. Onyń ishinde 8 joba ımport almastyrýǵa baǵyttalady», - dedi Beıbit Atamqulov Úkimet otyrysynda.
Mınıstrdiń aıtýynsha, ol jobalardy iske asyrý nátıjesinde ımport úlesin 15 paıyzǵa tómendetip, turǵyn úı qurylysynda otandyq ónimder qoldanysyn 90% paıyzǵa arttyrý josparlanyp otyr.
«Qazirgi ýaqytta nysandardy salý kezinde qurylys materıaldarynyń 11 túri joǵary suranysqa ıe. Olar: shyny, polıetılen qubyrlary, qurǵaq qurylys qospalary, armatýra, keramıkalyq taqtaısha, jylý oqshaýlaǵysh materıaldar, keramıkalyq otqa tózimdi kirpishter, sanfaıans, tusqaǵaz, shatyr materıaldary, lak-boıaý buıymdary. Árıne elde bul qurylys materıaldarynyń kópshiligi óndiriledi. Biraq naryqtyń qajettiligin tolyqtaı jaba almaıdy. Bıyl biz qurylys materıaldarynyń 5 túrin, atap aıtqanda shyny, polıetılen qubyrlary, qurǵaq qurylys qospalary, armatýra, keramıkalyq taqtaıshany óndirý boıynsha ımport almastyratyn 8 jobany iske qosýdy josparlap otyrmyz. Olardyń óndiris kólemi - 103 mlrd teńge. Bul jobalar ishki naryqtaǵy ımport úlesin 15%-ǵa tómendetedi», - dedi ol.
Sondaı-aq, jylý oqshaýlaǵysh materıaldar, keramıkalyq otqa tózimdi kirpish, sanfaıans óndiretin jobalardy iske asyrý kózdelýde. Olardyń óndiris kólemi 61 mlrd teńge bolady. Bul qurylys materıaldarynyń osy túrleri boıynsha ımport úlesin 8% paıyzǵa azaıtýǵa múmkindik beredi.
«Osylaısha qurylys materıaldarynyń negizgi túrleri boıynsha josparlanǵan barlyq jobalardy iske asyrý nátıjesinde ımportty 23%-ǵa azaıtamyz», - deıdi Beıbit Atamqulov.