Qazaqstan qurlyqtyq qaırańdaǵy platformalar qaýipsizdigine qatysty hattamaǵa qosyldy - Parlament
11:54, 03 Naýryz 2016
ASTANA. QazAqparat - Búgin Parlament Senatynyń jalpy otyrysynda «Qurlyqtyq qaırańda ornalasqan statsıonarlyq platformalar qaýipsizdigine qarsy baǵyttalǵan zańsyz is-árekettermen kúres týraly hattamaǵa 2005 jylǵy hattamany ratıfıkatsııalaý týraly» QR Zańy qabyldandy.
Atalǵan hattama 2005 jyly London qalasynda jasalǵan. Qujat boıynsha qurlyqtyq qaırańda ornalasqan statsıonarlyq platformalar qaýipsizdigine qarsy baǵyttalǵan terrorıstik aktilerdiń aldyn alý jáne jolyn kesý jónindegi yntymaqtastyqqa arnalǵan halyqaralyq quqyqtyq negiz jasaýdy kózdeıdi.
Hattamany qabyldaý halyqaralyq terrorızmge qarsy kúreste Qazaqstannyń shet memlekettermen praktıkalyq is qımylynyń tıimdiligin arttyrýǵa múmkindik beredi. Qazaqstannyń qurlyqtyq qaırańynda ornalasqan teńiz kemeleriniń jáne jasandy qurylystarynyń qaýipsizdigine quqyqtyq kepildikterdi kúsheıtýge yqpal etedi.
Parlament qabyldaǵan zań Memleket basshysynyń qol qoıýyna joldanady.