Qazaqstan kúrdter qaýymdastyǵynyń basshysy Knıaz Mırzoev dúnıeden ótti

NUR-SULTAN. QazAqparat - Qazaqstan kúrdter qaýymdastyǵynyń basshysy Knıaz Mırzoev dúnıeden ótti. Bul týraly Aqparat jáne qoǵamdyq damý mınıstrliginen málim etti, dep habarlaıdy QazAqparat.

«Aqparat jáne qoǵamdyq damý mınıstrligi ǵalym, Qazaqstan halqy Assambleıasy Keńesiniń múshesi, Qazaqstan kúrdter qaýymdastyǵynyń basshysy Knıaz Ibragımuly Mırzoevtyń mezgilsiz qaıtys bolýyna baılanysty marqumnyń otbasy men jaqyndarynyń qaıǵysyna ortaqtasyp kóńil aıtady», - delingen habarlamada.

Mınıstrlikten atap ótkendeı, Knıaz Mırzoev búkil sanaly ǵumyryn ǵylym men qoǵamǵa arnaǵan. Qazaqstan halqy Assambleıasynyń qyzmetine óz úlesin qosqan belsendi azamattyq ustanymy bar tulǵa bolǵan.

«Marqumnyń jarqyn beınesi, atqarǵan qyzmeti men eńbekteri jaqyndary men áriptesteriniń esinde máńgilik qalady», - dedi vedomstvodan.