Qazaqstan quramasynyń olımpıada kıimi qytaılyqtardyń nazaryn aýdardy

NUR-SULTAN. QazAqparat – 4 aqpanda Beıjiń ulttyq stadıonynda qysqy Olımpıada oıyndarynyń ashylý saltanaty ótti. Oǵan Qazaqstannyń memlekettik týymen shyqqan qazaqstandyq sportshylardyń kıgen kıimi Qytaı halqynyń nazaryn aýdardy, dep habarlaıdy QazAqparat tilshisi.

Atap aıtqanda, tý ustaýshy retinde qazaqtyń mádenı elementterine baı kıim kıgen qos qazaqstandyq sportshyny qytaılyq jeli qoldanýshylary weibo vebsaıtynda (Qytaıdyń Twitter jáne Facebook-ke eliktep jasaǵan áleýmettik jelisi-red.) kóptep qoshemettep jatty.

Kóptegen qytaılyqtar qysqy Olımpıada oıyndaryndaǵy qazaqtyń tý ustaýshy kıimin ótken jyly Tokıo Olımpıadasy kezindegi qazaqtyń tý ustaýshysynyń kıimimen salystyryp, «Qazaqstan kıim dızaıny jaǵynan kóptegen elderden áldeqaıda jaqsy eken» deıdi.

Jelide taǵy bir Qytaı azamaty «Meniń anama qazaq sportshylarynyń kıimderi qatty unaıdy. Men de dál sol kıimdi alǵym keledi» dep jazdy.

Aıta keterligi, olımpıada komandasyna arnalǵan sport formasyn qazaqstandyq ZIBROO kompanııasy shyǵardy.

Sherýge arnalǵan kollektsııany reseılik dızaıner, SHISHKIN brendiniń negizin qalaýshy Dmıtrıı Shıshkın daıyndaǵan.

Qazaqstan quramasynyń olımpıada ekıpırovkasyn daıyndaýǵa bir jyldan asa ýaqyt ketti.

Kıimdi daıyndaý protsesine atletterdiń ózderi qatysty. Olar formanyń dızaıny, sapasy men fýnktsıonalyna qatysty óz usynystaryn bildirgen.