Qazaqstan quramasy stend atýdan álem kýbogynda medal sany boıynsha birinshi oryn aldy

ASTANA. QazAqparat - Stend atýdan Qazaqstan quramasy Almatyda ótken reıtıngtik Álem Kýbogynda jalpy medaldyq esepte birinshi orynda aıaqtady. Bul týraly QazAqparat QR Mádenıet jáne sport mınıstri Ashat Oralovtyń Telegram kanalyna silteme jasap habarlaıdy.

«Jarystyń sońǵy kúninde mergenderimiz Marııa Dmıtrıenko men Vıktor Hasıanov «trap / mıks» aralas jattyǵýynda altyn medal jeńip aldy.

Osylaısha, Qazaqstan jalpy esepte eki altyn jáne bir kúmis júldemen birinshi oryndy ıelendi. Esterińizge sala keteıin, buǵan deıin «skıt» jattyǵýynda altyn medaldi Ásem Orynbaı jeńip alǵan bolatyn. Sondaı-aq ol Edýard Eşenkomen birge bizdiń quramaǵa «skıt / mıks» jattyǵýynda kúmis júlde ákeldi.

Bul úlken jetistik, otandastarymyzdy jáne, sportshylarymyzdy jarqyn jeńispen quttyqtaımyn. Almatyda 40-tan astam elden 350 mergen jarysty, bizdiń jigitter men qyzdar úzdik atandy. Qazaqstan quramasy bıik shyńdardy baǵyndyrýdy jalǵastyrýda, men olarǵa bul nátıjemen toqtap qalmaı, jankúıerlerdi jańa jeńistermen qýantýlaryn tileımin.

Sondaı-aq Qazaqstan sporttyq atys federatsııasynyń prezıdenti Berik Asylovty jeńispen quttyqtap, Álem Kýbogyn uıymdastyrǵany úshin alǵys aıtqym keledi»,-dep jazdy mınıstr.