Qazaqstan quramasyn XXXIII jazǵy Olımpıadaǵa shyǵaryp salý rásimi ótti
Qazaqstandyq sportshylardy Frantsııa astanasy Parıj qalasynda ótetin HHHІІІ jazǵy Olımpıadaǵa shyǵaryp salýǵa QR Týrızm jáne sport mınıstri Ermek Marjyqpaev, Olımpıada chempıondary Ermahan Ybraıymov, Islam Baıramýkov, Olga Shıshıgına, Dmıtrıı Balandın jáne BAQ ókilderi keldi.
QR Týrızm jáne sport mınıstri Ermek Marjyqpaev sportshylar jáne jattyqtyrýshylar quramyna aldaǵy jarystarǵa sáttilik tiledi.
Mınıstr bul oqıǵanyń elimiz úshin erekshe mańyzǵa ıe ekenin atap ótti.
«Sizderdiń aldyńyzda elimizdi Parıj Olımpıadasynda tanystyrý, el namysyn abyroımen qorǵaý sııaqty mańyzdy ári óte jaýapty mindet tur. Sizderdiń chempıondyq minezińiz, tabandylyǵyńyz, jeńiske degen erik-jigerińiz, osy kúnge deıin jıǵan tájirıbelerińiz, jattyqtyrýshylardyń, dárigerlerdiń, massaj jasaýshylardyń qajyrly eńbeginiń arqasynda úlken nátıjege jetetinimizge senimdimin. Táýelsizdik jyldarynda Qazaqstan jazǵy jáne qysqy Olımpııa oıyndarynyń 79 júldegerin, onyń ishinde 15 Olımpıada chempıonyn tárbıelep shyǵardy. Olımpıadadaǵy jetistikter — búkil eldiń álemdegi ımıdji, memlekettiń ál-aýqatynyń kórsetkishi, eń bastysy, bul — sizderdiń kópjyldyq jáne qajyrly eńbekterińizdiń nátıjesi», — dedi Ermek Marjyqpaev.
Erkin kúresten eńbek sińirgen sport sheberi jáne Sıdneı Olımpıadasynyń kúmis júldegeri Islam Baıramýkov, qazaqstandyq sportshylarǵa senim mol ekenin jetkizdi.
«Olımpıada oıyndarynda jeńiske jetý – kez kelgen sportshynyń armany.Sport zalyna kelgen kúninen bastap, aldyna osyndaı maqsat qoıady. Bizde qazir erkin kúresten tórt joldama bar. Qazaqstan komandasynyń múshesi Meırambek Qartbaı jaqynda aldy. Jigitterdiń jeńis tuǵyrynan kórinýge múmkindikteri bar»,- dedi Islam Baıramýkov.
Frantsııa astanasynda Qazaqstan quramasy sapynan 80 sportshy sporttyń 25 túrinen baq synap, 81 medal jıyntyǵyna talasady.
Aıta ketý kerek, Qazaqstan Táýelsizdik jyldarynan beri osymen segizinshi márte jazǵy Olımpıadaǵa qatyspaq.
Qazaqstan quramasynyń sportshylary bıyl alǵash ret Olımpıada baǵdarlamasyna engen breıkıng jáne badmınton sııaqty sport túrlerinen óner kórsetedi. Breıkıngten el namysyn Ámir Zakırov qorǵasa, badmınton saıysynda Dmıtrıı Panarın baq synaıdy.
Olımpııa oıyndarynyń ashylý saltanaty 26 shildede Parıjdegi Sena ózeninde ótedi. Jarysqa 205 elden 10 myńnan astam sportshy qatysady. Olar 32 sport túrinen 329 medal jıyntyǵyn sarapqa salady.
Naqtyraq aıtsaq, boks, dzıýdo, sportttyq gımnastıka, jeńil atletıka, baıdarka men kanoede esý, oqpen atý, semserlesý, grek-rım kúresi, erkin kúres, sadaq atý, stendtik atý, tennıs, veloshosse, júzý, zamanaýı bessaıys, taekvondo, velotrek, batýt gımnastıkasy, badmınton, akademııalyq esý, kórkem gımnastıka, trıatlon, ústel tennısi, quzǵa shyǵý jáne breıkıngten Olımpıada oıyndarynda synǵa túsedi.
Osyǵan deıin Almatydaǵy Olımpıadaǵa daıyndyq ortalyǵynda sportshylardyń qalaı jattyǵyp jatqany týraly jazǵan edik.
Esterińizge sala keteıik, elimizde alǵash ret Olımpıada oıyndaryn bes birdeı telearna tikeleı efırde kórsetetin bolady.
Olımpıada oıyndarynan 21 qazaqstandyq jýrnalıst tikeleı habar taratady.