Qazaqstan krıptovalıýta óndirý boıynsha kóshbasshylar qatarynda
Spıkerdiń sózinshe, Qazaqstan krıptovalıýta óndirý kórsetkishi boıynsha kóshbasshylar qatarynda.
«Krıptovalıýta álemniń keıbir elderinde tólem quraly retinde qoldanylsa, endi bir jerde aktıv retinde paıdalanylady. Adamdar ony saqtap, qaıta sata alady. Máselen, Qazaqstanda bul aktıvterdiń generatsııasy ótken jyly oryn aldy, ol shamamen 18 paıyzdy qurady. Bul belsendi ónim, ashyq halyqaralyq naryq. Qazaqstandyqtar úshin beımálim dúnıe emes. Sondyqtan bizdiń elde de mańyzdy ról atqardy. Árıne, bul naryq tez damyp kele jatqandyqtan, oıyn erejesin qurý mańyzdy boldy. 1 qańtardan bastap elimizde tsıfrlyq aktıvterdi shyǵarýǵa jáne olardyń aınalymyna, tsıfrlyq maınıng qyzmetin damytýǵa qatysty zań kúshine endi»,- deıdi Tórtinshi ónerkásiptik revolıýtsııa úlestes ortalyǵynyń basyshysy Pavel Koktyshev.
Aıtýynsha, bul tsıfrlyq aktıvterdiń zańdy naryǵyn qalyptastyrýǵa, osy salaǵa sheteldik ınvestıtsııalardy tartýǵa jáne Qazaqstan ekonomıkasyn damytýǵa yqpal etpek.
«Mysaly túsken salyq densaýlyq saqtaý salasynyń ınfraqurylymyna baǵyttalýy múmkin. Maınıng qana emes, jalpy barlyq tsıfrlyq sala men tehnologııalar, kez kelgen AІ joba ońtaılandyrýǵa umtylatynyn túsiný óte mańyzdy. Onyń salyq arqyly qarjy ákeletinin umytpaýymyz kerek. Al memlekettiń áleýmettik tolyq portfeli salyqtan qalyptasady»,- dedi spıker.
Qazaqstandyq blokcheın-tehnologııalar qaýymdastyǵynyń tóraǵasy Sapar Ahmetov atalmysh salada jumys isteıtin qazaqstandyq kompanııalardyń da aıtarlyqtaı qıyndyqtarǵa tap bolǵanyn aıta ketti.
«Alaıda bıyl biz oń úrdisterdi baıqap otyrmyz. Memleket salanyń damý úrdisterine túsinistikpen qaraıdy. Bul áýeli Qazaqstanda júzege asyrylyp jatqan jobanyń alǵysharttary. Bizdiń qaýymdastyq úkimetpen jáne AHQO-men jumysty bıyl da jalǵastyrady», - dedi ol.
Ahmetov qaýipsizdik máselelerin eskere jáne aqshany jylystatýǵa qarsy is-qımyl jasaýǵa jaǵdaı jasaı otyryp, Qazaqstanda krıptovalıýta aınalymyn engizý qajet ekenine senimdi. Qaýymdastyq óz tarapynan bilim berý baǵdarlamalaryn júzege asyrýdy qarastyra bastady. Sebebi naryqta krıptotreıderler men alaıaqtardyń kóbeıýine baılanysty azamattardy saýattandyrý qajet.
«Kóptegen elderde krıptovalıýtalar tólem quraly retinde qoldanylady. Bizde oǵan Ulttyq bank áli daıyn emes, degenmen bolashaqta jetemiz dep oılaımyn», - dedi ol.
Aıta keteıik, Almatyda «Digital Almaty 2023: jańa bolmystaǵy tsıfrlyq áriptestik» halyqaralyq forýmy ótip jatyr.
Foto: fasthash.io