Qazaqstan kóshi-qon úderisi aıasyndaǵy balalardy qorǵaý jobasyna qatysady

ASTANA. QazAqparat - Búgin Qazaqstan Respýblıkasyndaǵy Adam quqyqtary jónindegi ýákil Asqar Shákirov Qazaqstandaǵy ıÝNISEF ókili ıÝrıı Oksamıtnyımen kezdesti. Onda eldegi balalar quqyqtaryn qorǵaý salasyndaǵy yntymaqtastyq pen ony damytý perspektıvalary talqylandy, dep habarlaıdy QazAqparat.

Atap aıtqanda, taraptar «Ońtústik-Shyǵys, Ońtústik jáne Ortalyq Azııadaǵy kóshi-kon úrdisterinde balalardy qorǵaý» baǵdarlamasy sheńberindegi birlesken jumys týraly ýaǵdalasty. Jobanyń maqsaty kóshi-qon úrdisterine qatysy bar balalarǵa jan-jaqty qoldaý kórsetý bolyp tabylady. Baǵdarlama 3 jylǵa josparlanǵan jáne osy baǵyttaǵy zańnamalyq bazany jetildirýge, atalǵan óńirlerdegi elderdiń ózara árekettesýin nyǵaıtýǵa baǵyttalady.

Sondaı-aq, kezdesýde Ulttyq aldyn alý tetigi sheńberindegi ózara árekettestik máseleleri qaraldy. Aıta keterligi, qazirgi ýaqytta Parlamenttiń qaraýynda jatqan zań jobasynda balalarǵa arnalǵan 200-den asa ınstıtýttyq mekemelerdi Ulttyq aldyn alý tetigine engizip, osy arqyly aldyn alý tetiginiń mandatyn keńeıtý kózdelgen. Sonymen qatar, zań jobasy boıynsha UAT balalar mekemelerindegi adamgershilikke jat qarym-qatynastyń aldyn alýǵa baǵyttalǵan monıtorıngke qatysady.

Taraptar otbasynda, mektepter men balalarǵa arnalǵan mekemelerde zorlyq-zombylyqtyń aldyn alý jáne balalardyń quqyqtaryna monıtorıng júrgizý boıynsha birlesken jobalarǵa da toqtaldy. Aıta keterligi, Qazaqstandaǵy Ombýdsmenniń osy másele boıynsha oń tájirıbesine sheteldik áriptester aıtarlyqtaı qyzyǵýshylyq týdyrýda.