Qazaqstan qorjyny taǵy bir Parıj Paralımpıada joldamasymen tolyqty
Qazaqstandyq parasportshy Erkin Ǵabbasov para oq atýdan Álem Kýbogynda ekinshi oryn alyp, Parıj-2024 Paralımpıada oıyndarynyń joldamasyn jeńip aldy.
Erkin R1 dıstsıplınasynyń jartylaı fınalynda 7-orynǵa turaqtap, fınalǵa shyqsa, aqtyq synda ol 246,8 upaımen jarystyń kúmis júldesine qol jetkizdi. Al, altyn medaldy 249 upaı jınaǵan koreıalyq Dj.Lı alsa, úshinshi oryn 224.8 upaı jınaǵan grekııalyq sportshy S.Galogavrosqa buıyrdy.
«Para oq atýdan álem kýbogynyń erejesi boıynsha jartylaı fınalda 1-8 orynǵa turaqtaǵan sportshylar fınalǵa ótedi. Bizdiń sportshymyz fınalda ózin jaqsy kórsetip, ekinshi orynǵa shyqty. Altyn medalǵa tek 3 upaı jetpeı qaldy. Jarystyń jeńimpazy koreıalyq Djangho Lı-da Paralımpıada oıyndarynyń joldamasy bolǵandyqtan, ekinshi oryn alǵan qazaqstandyq sportshyǵa Parıj-2024 lıtsenzııasy beriledi. Osymen bıylǵy Paralımpıada oıyndaryna 11 lıtsenzııamyz bar. Buǵan deıin voleıboldy otyryp oınaý quramasy, para kanoedan Spataı Bıbarys, para jeńil atletıkadan Dastan Muqashbekov, para paýerlıftıngten Davıd Degtıarev, para júzýden 3 sportshy, para taekvondodan Kamılıa Dosmalova, Nurlan Dombaev jáne Nyshan Ómiráli alǵan bolatyn. Endi mine para oq atýdan Erkin Ǵabbasov baıraqty dodaǵa joldama alyp otyr. Paralımpıada oıyndaryna deıin lıtsenzıat sportshylardyń sany áli artady dep senemin», - dedi Sultanbek Qabı Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń komanda basshysy.
Aıta ketsek, para oq atýdan WSPS álem kýbogy Nıý Delıde 6 naýryzda bastalǵan bolatyn. Jarys 15 naýryz kúni máresine jetedi. Jarysqa 49 elden 268 sportshy qatysyp jatyr.