Qazaqstan kórshi memleketterge qandaı taýarlardy shyǵara alady
«Máselen, biz Reseıge baǵyttalǵan eksportty 80 taýarlyq pozıtsııaǵa deıin arttyra alamyz. Qazaqstandyq naryqtan Reseıge metall ónerkásibiniń, hımııa ónerkásibiniń taýarlary, azyq-túlikter, ýran men basqa da taýarlar tartymdy. Biz olarǵa 245,6 mln dollardyń taýaryn tasymaldaı alamyz. Sol sekildi, Qytaıǵa quny 1,6 mlrd dollarlyq 60 taýar túrin jibererlik áleýet bar. Atap aıtqanda, ol jaqqa temir men bolattyń ılemdelgen túrin, jartylaı fabrıkattar men ýran, kúkirt, bıdaı, maı ónimderin, kondıterlik ónimderdi shyǵara alamyz. Odan bólek, Qytaıǵa bizdiń elden buryn aparylmaǵan oksıd, tsement, metaldyń bólek túrleri sekildi taýardyń 30 túrin saýdalaýǵa múmkindik bar», - dedi QR Saýda jáne ıntegratsııa vıtse-mınıstri búgin Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, qazaqstandyq kásipkerler Túrikmenstanǵa quny 123 mln dollarǵa taýardyń 40 túrin, Ózbekstanǵa 210 mln dollarlyq 70 taýar túrin shyǵara alady.
Eske sala ketsek, buǵan deıin Qaırat Tórebaev Eýrazııalyq ekonomıkalyq odaq aıasynda Reseı naryǵyna engen otandyq kompanııalar betpe-bet kelgen problemalaryn aıtqysy kele bermeıtinin málim etken edi.