Qazaqstan koreıaaralyq dıalogtyń qaıta qalpyna kelýin qoldaıdy

ASTANA. QazAqparat - Resmı Astana aldaǵy ýaqytta ótetin koreıaaralyq sammıtten úlken nátıjeler kútedi. Bul týraly búgin Koreıa Respýblıkasynyń Syrtqy ister mınıstri Kan Gen Hvamen kezdesýden keıingi birlesken málimdeme jasaý barysynda QR Syrtqy ister mınıstri Qaırat Ábdirahmanov aıtty, dep habarlaıdy QazAqparat.

«Qazaqstan koreıaaralyq dıalogtyń qaıta qalpyna kelýin jáne Koreıa Respýblıkasy men Koreı Halyqtyq Demokratııalyq Respýblıkasy arasynda sammıt ótkizý týraly ýaǵdalastyqqa qoldaý bildiredi. Astana aldaǵy ýaqytta ótetin koreıaaralyq sammıtten úlken nátıjeler kútedi jáne bul kezdesý eki memleket arasyndaǵy qarym-qatynasty jaqsartý máselelesine serpin bererine ári koreı túbegindegi shıelinistiń túıinin tarqatatyndyǵyna úmit artady», - dedi mınıstr.
 

Qaırat Ábdirahmanovtyń aıtýynsha, Qazaqstan úshin koreı túbeginiń ıadrolyq qarýdan azat aımaqqa aınalýy túbegeıli másele. Óıtkeni Qazaqstan ıadrolyq qarýdy taratpaý isinde tarıhı rólge ıe.

Aıta keteıik, buǵan deıin Qazaqstandaǵy Koreıa Respýblıkasynyń Tótenshe jáne Ókiletti Elshisi Kım Desık Ońtústik Koreıa Prezıdenti Mýn Chje Inniń Ortalyq Azııaǵa, sonyń ishinde Qazaqstanǵa sapary datasynyń aýystyrylýyn túsindirgen bolatyn. 
 

«Aldaǵy sammıtterdiń (eki Koreıa men KHDR-AQSh arasyndaǵy) tarıhı mańyzdylyǵyn eskere otyryp, Koreıa Respýblıkasynyń prezıdenti eldi tastap kete almaıdy. Sondyqtan, 2018 jyldyń birinshi jartyjyldyǵyna josparlanǵan sapar keıingi qaldyryldy. Bul aqparatty dıplomatııalyq kanaldar arqyly memleket basshylyǵyna habarlaǵanymyzda, Nursultan Nazarbaev jaǵdaıdy óte jaqsy túsindi. Ol Koreıa túbegindegi kelissózderdiń beıbitishilik pen tynyshtyq ákelýi úshin tabys tiledi. Túsinispeýshilik bolǵan joq», - dedi Elshi Astanadaǵy baspasóz máslıhatynda.