Qazaqstan Koreı túbegindegi ıadrolyq qarýǵa qatysty máselede senimdi áriptesimizge aınaldy - Donald Tramp

VAShINGTON. QazAqparat - Qazaqstan Koreı túbegindegi ıadrolyq qarýǵa qatysty máselede AQSh-tyń senimdi áriptesine aınaldy. Bul týraly búgin Aq úıde Qazaqstan Prezıdenti Nursultan Nazarbaevpen ekeýara kezdesýden keıin birlesken málimdeme jasaý barysynda Amerıka Qurama Shtattarynyń Prezıdenti Donald Tramp aıtty, dep habarlaıdy QazAqparat.

«Qazaqstan Koreı túbegindegi ıadrolyq qarýǵa qatysty máselede senimdi áriptesimizge aınalyp otyr. Biz birlesip Soltústik Koreıa rejiminiń álemge ıadrolyq qarý qaýpin tóndirýinen qorǵaı alamyz. Prezıdent Nazarbaevqa Aýǵanstandaǵy áreketimizge qoldaý kórsetkeni úshin alǵys aıtamyn. Qazaqstannyń DAISh jáne Talıban sodyrlarymen kúreste mańyzdy logıstıkalyq qoldaý kórsetýin joǵary baǵalaımyn», - dedi ol.

Sonymen qatar Tramp Qazaqstannyń aýǵan jastarynyń bilim alýyna jaǵdaı jasaýyn, eldegi qaýipsizdikti nyǵaıtýǵa belsene kómek kórsetkenin joǵary baǵalaıtyndyǵyn basa aıtty.

«Biz Qazaqstandy kórshilerine qurmetpen qaraıtyn, óz taǵdyryna, ózine jaýapty egemen el retinde esepteımiz. Prezıdent Nazarbaev 2050 jyly Qazaqstandy álemniń damyǵan 30 eliniń qataryna qosý josparymen bólisti. Sonymen qatar eldegi bıznes ókilderine qolaıly jaǵdaı jasalǵanyn málimdedi. Bul óz kezeginde amerıkalyq kompanııalardyń Qazaqstandy tıimdi jumys isteýine múmkindik jasaıdy. Amerıkalyq kásipkerler Qazaqstan ekonomıkasyna ınvestıtsııa salý boıynsha aldyńǵy qatarda. Eki aradaǵy saýda jáne ekonomıkalyq baılanysty nyǵaıtý maqsatynda N.Nazarbaev AQSh-tyń iskerlik toptarynyń ókilderimen kezdesedi. Biz saýdanyń ekijaqty jáne ádil bolýy kerek ekenine kelisemiz», - dedi AQSh Prezıdenti.

Foto avtory: Baýyrjan Jýasbaev