Qazaqstan qor bırjasyndaǵy saýda-sattyq kólemi tómendedi

ASTANA. QazAqparat – Qazaqstan qor bırjasyndaǵy saýda-sattyqtyń ortasha kúndik kólemi bir aıda 98 mln AQSh dollarynan 91 mln AQSh dollaryna deıin tómendedi. Bul týraly QazAqparat Ulttyq bankke silteme jasap habarlaıdy.

«Saýda-sattyqtyń jalpy kólemi 2 mlrd AQSh dollaryn qurady. Valıýta naryǵy burynǵysynsha syrtqy faktorlardyń qysymynda qalyp, geosaıası arenadaǵy qaqtyǵystar kúsheıdi, energııa tasymaldaýshylar baǵasy tómendep, AQSh dollary jahandyq deńgeıde nyǵaıdy. Kvazımemlekettik sektor sýbektileriniń valıýtalyq túsimdi satýy shamamen 583,5 mln AQSh dollaryn qurady. Kvazımemlekettik sektor kompanııalary ekinshi deńgeıli bankter arqyly valıýta naryǵynda satýdy óz betinshe júzege asyrady», - delingen banktiń habarlamasynda.

Sonymen qatar ulttyq qordan respýblıkalyq bıýdjetke transfertterdi qamtamasyz etý úshin valıýta satý qyrkúıekte 85,1 mln AQSh dollaryna shyqty. Ulttyq qordan satý úlesi jalpy saýda-sattyq kóleminiń 4,3%-yn qurady.

Ulttyq bank qyrkúıekte valıýtalyq ınterventsııalar júrgizgen joq, sondaı-aq BJZQ zeınetaqy aktıvteri men senimgerlik basqarýdaǵy basqa da qorlar úshin shetel valıýtasyn satyp alý nemese satý boıynsha operatsııalardy júzege asyrmady.