Qazaqstan kóptegen el úshin jaqsy ári senimdi áriptes bola alady dep oılaımyz – Prezıdent
Prezıdent Toqaev suhbat barysynda Qazaqstan ashyq naryqtyq ekonomıkasy bar el ekenin jáne kóptegen elder úshin jaqsy ári senimdi seriktes bola alatynyn atap ótti.
«Meniń oıymsha, Qazaqstan bizdiń óńirde, Ortalyq Azııada, tipti odan tys jerlerde óte mańyzdy ról atqarady», – dedi QR Prezıdenti.
Qasym-Jomart Toqaev jaqyn kórshisi Reseı týraly sózinde eldi «Qazaqstannyń strategııalyq seriktesi» dep atap, qos memleketti álemdegi eń uzyn qurlyqtaǵy shekara baılanystyryp jatqanyn eske saldy.
«Bizde jaqsy yntymaqtastyq dástúri bar, ony saqtaýymyz nemese joq degende odan bas tartpaýymyz kerek. Halyqaralyq arenadaǵy keıbir silkinisterge qaramastan, biz birlesip jumys isteı beremiz dep oılaımyn», – dedi Toqaev.
Memleket basshysy sondaı-aq, jýyrda prezıdent Pýtınniń Qazaqstanǵa jasaǵan sapary týraly aıtyp, bul sapar memleketter arasyndaǵy yntymaqtastyqty damytýǵa qosymsha serpin berý turǵysynda asa jemisti bolǵanyn atap ótti.
«Reseıdi áli de Qazaqstannyń jaqsy seriktesi, strategııalyq seriktesi dep sanaımyz. Biz – bir halyqaralyq uıymdar men qurylymdardyń múshesimiz, Reseı qazirgi álemde óte mańyzdy ról atqarady», – dedi Toqaev. Prezıdent sonymen qatar Reseıdiń asa mańyzdy el jáne onymen yntymaqtasý qajettigin moıyndaý kerek ekenin tilge tıek etti.
Budan bólek, Qasym-Jomart Toqaev Qazaqstan ártaraptandyrylǵan halyqaralyq saıasatty ustanatynyn jáne Qytaımen, Ortalyq Eýropadaǵy, Batys Eýropadaǵy áriptesterimen tamasha qarym-qatynasta ekenin, sondaı-aq AQSh-pen strategııalyq seriktestikti qoldaıtynyn qýattady.
Aıtýynsha, Qazaqstannyń syrtqy saıasaty eldiń geografııalyq ornalasýyna tolyǵymen sáıkes keledi jáne únemi ártaraptandyrylyp otyrady.