Qazaqstan – qonaqjaı el – Halyqaralyq shahmat federatsııasynyń prezıdenti

ALMATY. QazAqparat – Qazaqstanda shahmattan álemniń úzdik oıynshylaryna qolaıly jaǵdaı jasalǵan. Bul týraly Óńirlik kommýnıkatsııalar qyzmetinde ótken baspasóz máslıhaty barysynda Halyqaralyq shahmat federatsııasynyń (FIDE) prezıdenti Arkadıı Dvorkovıch málim etti, dep habarlaıdy QazAqparat tilshisi.

«Biz Qazaqstanda birinshi ret jarys ótkizip otyrǵan joqpyz. Bul - qonaqjaı el. Munda álemniń úzdik oıynshylaryna barlyq qajetti jaǵdaı jasalǵan. Qazaqstanda áıelder arasyndaǵy FIDE gran-prıiniń kezeńi ótti, sonymen qatar Aqtóbede meniń ákemdi eske alýǵa arnalǵan «Vladımır Dvorkovıch memorıaly» halyqaralyq shahmat festıvali ótti. Sonymen qatar, árıne, biz aldaǵy týrnırlerdi, sonyń ishinde balalar týrnırlerin ótkizý jaıyn talqylap jatyrmyz. El Prezıdentine, Úkimetke jáne bizdiń seriktesterge kórsetip jatqan qoldaýy úshin alǵys aıtqym keledi», - dedi A.Dvorkovıch.

Spıker ótip bara jatqan jyldyń qıyn, ári óte sátti bolǵanyn atap ótti.

«Úndi dostarymyzdyń arqasynda biz Olımpıadany uıymdastyrýǵa qol jetkizdik, qyrkúıekten qarashaǵa deıin bar bolǵany úsh aıdyń ishinde ótken jyldardan beri keıinge qaldyrylǵan onnan astam álem chempıonatyn ótkizdik. 2022 jyly shahmattyń klassıkalyq taqtada da, onlaın rejımde de tanymaldylyǵyn arttyrýǵa qol jetkizdik. Júlde qorynyń ósip kele jatqanyn kórip otyrmyz, biz áıelder shahmaty jylyn ótkizdik jáne kóp týrnırler, oqý-jattyǵý protsesteri kóp boldy, uıymdastyrýshy, menedjer jáne tóreshi retinde áıelderdiń kóp bolýyna qol jetkize aldyq. Bul áıelder shahmatynyń aldaǵy on jylyna jaqsy bastamasy dep senemiz», - dedi ol.

Sonymen qatar, Halyqaralyq shahmat federatsııasynyń prezıdenti Arkadıı Dvorkovıch basty jetistik – kóptegen elderde júzege asyrylyp jatqan «Mekteptegi shahmat» jobasy ekenin eske saldy. Qazaqstan – shahmatty bilim berý baǵdarlamasyna engizgen eldiń bir.

Aıta keteıik, Almatydaǵy Balýan Sholaq atyndaǵy sport jáne mádenıet saraıynda shahmattyń rapıd jáne blıts túrinen álem chempıonaty ótip jatyr.

Jahandyq dodaǵa 50 eldiń úzdik 290 shahmatshysy qatysady. Ashyq týrnırge 176 oıynshy qatysady. Saıystyń favorıti sońǵy 10 jyldaǵy álem chempıony Magnýs Karlsen (Norvegııa).

Áıelder týrnırinde 100-den astam sportshy baq synaıdy. Qazaqstannyń namysyn álemge áıgili shahmatshylar Jansaıa Ábdimálik pen Bıbisara Asaýbaeva qorǵaıdy.