Qazaqstan kompanııalarynyń atyn jamylǵan alaıaq saıttyń kóbi AQSh-ta tirkelgen - ІІM

ASTANA QazAqparat –Qazaqstandyq kompanııalardyń atyn jamylǵan jalǵan saıttar AQSh-ta tirkelgen. Bul týraly QR Іshki istr mınıstrliginiń ókili Shuǵyla Turlybek málim etti, dep habarlaıdy QazAqparat tilshisi.

«Internet jelisinde, onyń ishinde áleýmettik jeliler men messendjerlerde salǵan aqshańyzdy birneshe eselep qaıtaratyn jobalardyń jarnamalary jyldam tarap jatyr.

Qazaqstannyń ulttyq kompanııalarynyń joǵary tabys ákeletin ınvestıtsııalyq jobalary týraly aqparat taraýda. Domendik ataýlaryn tekserý kezinde atalǵan saıttardyń mazmuny birdeı ekeni jáne AQSh-ta tirkelgeni belgili boldy.

Paraqtaryn tekserý kezinde ondaı saıttardyń bir ǵana negizgi paraqtan turatyny anyqtaldy. Ol paraqta tirkelý úlgisi ornalasqan. Artynsha birden sátti tirkelgenińizdi jáne jeke akkaýntyńyzdy ashý kerektigin aıtatyn mátin shyǵady. Bul azamattardyń derbes derekterin jınaýǵa arnalǵan fıshıng saıt dep qaraýǵa negiz bar», - dedi Shuǵyla Turlybek.

Aıtýynsha, QR Іshki ister mınıstrligi atalǵan resrýstardyń ıelerin bilý úshin AQSh-tyń Ádilet mınıstrligine tıisti saýal joldapty.

«Jyl basynan beri joǵary tabys ýáde etken 769 alıaqtyq faktisi tirkeldi. 120 jaǵdaıda alaıaqtar túrli kompanııalardyń ınvestıtsııalarynyń atyn jamylǵan. Solardyń ishinde 22 jaǵdaıda «QazMunaıGazdyń», 6 jaǵdaıda «Halyq banktiń» jáne «Eńbek ınvest», «QazMıneral», «Forex Freedom»-nyń atyn jamylý arqyly azamattardy tartqan. Mundaı resrýstar ınterneti bar kez kelgen jerde ashylýy múmkin. Oǵan qarsy turýdyń eń tıimdi joly monıtorıng arqyly anyqtap, buǵattap otyrý qajet. ІІM osy baǵytta udaıy jumys istep keledi. Jyl basynan beri 121 resrýs anyqtalyp, qazaqstandyqtar kire almaıtyndaı bolýy úshin «Kıberqadaǵalaý» aqparattyq júıesine engizildi», - dedi Shuǵyla Turlybek.