Qazaqstan kommýnısteri jastardy jumyspen qamtý máselesin qozǵady

AQTÓBE. QazAqparat – Aqtóbe qalasynda ótken qoǵamdyq talqylaýda Qazaqstan Halyqtyq kommýnıstik partııasynyń ókilderi jastar arasyndaǵy jumyssyzdyq máselesin sheshýdiń birneshe baǵytyn usyndy, dep habarlaıdy QazAqparat tilshisi.

Qazaqstan kommýnısteri Aqtóbede basqosty. Jıynǵa atqarýshy bılik ókilderimen qatar jastar da qatysty.

«Jastarǵa birden jumysqa ornalasý qıyn. Dıplomdy qolǵa alyp, mamandyq ıesi atanǵan kúnniń ózinde ýaqyt joǵaltyp alady. Kommýnıster partııasy jastarǵa ınvestıtsııa salý qaıtarymdy is dep sanaıdy. Olarǵa jumsalatyn qarjynyń bári oryndy. Jastar úshin beriletin nesıeniń paıyzy tómen bolsa deımiz. Sonymen birge oqý oryndary men kásiporyndar arasynda kelisimshart bolǵany jón», - dedi QHKP oblystyq fılıalynyń ekinshi hatshysy Altynaı Jetpisbaeva. Sondaı-aq mamandar jastardy qoljetimdi baspanamen qamtamasyz etý úshin «7-20-25» jáne «Shańyraq» baǵdarlamalaryn qaıta qaraý qajet dep esepteıdi.

«Dýaldy júıe óz jemisin bere bastady. Onyń aýqymyn keńeıtý qajet. Jas maman jumysqa barǵan kezde onyń kásibıligine kúmánmen qaraıdy. Keıbiri beıresmı jumysqa ornalastyrady. Ol da ózekti másele. Bıylǵy túlektiń 67 paıyzy eńbekke aralasty. Ózgesi óz ornyn taba almaı júr. Oqý oryndary óz mindetterin oryndaýǵa kúsh salady. Al jumyspen qamtý ortalyqtary bos oryndar jármeńkesin ótkizedi. Sonda da osy másele túbegeıli sheshimin tappaı tur», - dedi oblystyq bilim basqarmasynyń bólim jetekshisi Venera Shavkılova.

Jıyn kezinde memlekettik qyzmetkerler partııa ókilderiniń usynysyn tyńdap, olardy sheshý jolyn qarastyratynyn aıtty.