Qazaqstan kommýnısteri el halqyn tolǵandyratyn basty 5 problemany atady
Saıttaǵy málimetterge qaraǵanda, taldaý úshin QKHP-nyń qoǵamdyq qabyldaýlaryna jáne «Shapaǵat» halyqtyq jobasyna osy jyldyń bes aıynda kelip túsken azamattardyń ótinishteri negiz boldy. Bul rette, osy ýaqyt ishindegi ótinishter sany ótken jylmen salystyrǵanda aıtarlyqtaı ósti.
Pandemııa kezeńinde tabysynan aıyrylýyna baılanysty nesıelerdiń merzimin ótkizip alý jáne tólemeý qazaqstandyqtar úshin №1 problemaǵa aınaldy. Ekinshi orynda «turǵyn úı máselesi» tur. Bul «saqaldy qurylystardyń», eski jáne apattyq jaǵdaıdaǵy turǵyn úılerdiń, sondaı-aq banktik mólsherlemeniń joǵary bolýyna baılanysty turǵyn úıdi ıpotekaǵa satyp alý múmkindiginiń tómendigi týraly máseleler.
Problemalardyń «úzdik» úshtigine TÚKSh tarıfterin kóterý de kirip otyr. Sonymen qatar egde jastaǵy qazaqstandyqtar zeınetaqy jasy men shaǵyn zeınetaqynyń ósýine shaǵymdanýda. Al jastar oqshaýlaný kezeńinde shıelenisken otbasylyq-turmystyq zorlyq-zombylyqtyń ósýinen zardap shegýde.
«Partııanyń qoǵamdyq qabyldaýlaryna adamdar kóbinese zań kómegin alýǵa júginedi. Máselen, memlekettik organdar tarapynan bıýrokratııalyq kedergilerge tap bolady. Osyndaı ótinish berýshilermen bizdiń zańgerler jumys isteıdi. Olar árbir máselege erekshe kóńil bóledi, al keıinnen sheshimderdiń oryndalýyna baqylaý júrgizedi. Azyq-túlik jáne moraldyq qoldaý «Shapaǵat» halyqtyq jobasy arqyly júzege asyrylady. Ol turmysy tómen, áleýmettik turǵydan qorǵalmaǵan otbasylar men ómirlik qıyn jaǵdaıǵa tap bolǵan adamdarǵa arnalǵan. Aǵymdaǵy kezeńde partııa tarapynan respýblıka boıynsha 19 000 (on toǵyz myń) adam qamtyldy…», – deıdi QKHP sarapshylary.