Qazaqstan kómiri Fınlıandııa men Japonııaǵa eksporttala bastady

ASTANA. QazAqparat - Qazaqstannyń kómiri Fınlıandııa men Japonııaǵa eksporttala bastady, dep habarlaıdy QazAqparat tilshisi.

Bul týraly QR Energetıka mınıstri Qanat Bozymbaev Ortalyq kommýnıkatsııalar qyzmetinde ótken baspasóz máslıhatynda aıtty.

"Qazaqstannyń kómiri Reseı Federatsııasyna, Ortalyq Azııaǵa jáne Eýropanyń birqatar elderine eksporttalady. Bıyl Fınlıandııaǵa 2,7 mln tonna jiberildi jáne RF úkimetiniń arnaıy qaýlysy shyǵyp, Reseı porttary bizdiń kómirdi eksportqa shyǵara bastady. Osylaısha, Japonııaǵa alǵash ret 9,3 myń tonna kómir jóneltildi", - dep atap ótti  Qanat Bozymbaev.

QR Energetıka mınıstriniń aıtýynsha, bıylǵy 10 aıda Qazaqstandaǵy kómir óndirý kólemi 86,6 mln tonnany quraǵan. Onyń 61,8 mln tonnasy ishki naryqqa jetkizilse, shamamen 23,4 mln tonnasy - syrtqa eksporttalǵan.