Qazaqstan kómir stantsııalaryn gazǵa kóshirýge múddeli - Álıhan Smaıylov
Kezdesýde taraptar Qazaqstannyń jahandyq energetıkalyq qaýymdastyqpen yntymaqtastyǵyn nyǵaıtý máselelerin talqylady.
Álıhan Smaıylov álemdik salalyq qoǵamdastyqtyń senimdi jáne jaýapty múshesi retinde Qazaqstannyń pozıtsııasyn nyǵaıtý úshin Úkimet barlyq qajetti sharalardy qabyldap jatqanyn atap ótti.
Máselen, elimiz klımattyń ózgerýi jónindegi Parıj kelisimin ratıfıkatsııalady jáne 2030 jylǵa qaraı parnıktik gazdar shyǵaryndylaryn 15%-ǵa qysqartý boıynsha mindettemelerdi moınyna aldy, sondaı-aq qazirgi ýaqytta 2060 jylǵa deıin kómirtegi beıtaraptyǵyna qol jetkizý strategııasyn ázirlep jatyr.
«Qazaqstan kómir stantsııalaryn gazǵa kóshirý, munaı-gaz hımııasy men sýtegi energetıkasyn damytý boıynsha yntymaqtastyqqa múddeli. Osyǵan baılanysty biz Dúnıejúzilik munaı keńesiniń saraptamalyq baǵalaýyn qarastyrýǵa árqashan daıynbyz», — dedi Premer-Mınıstr.
Sonymen qatar Úkimet basshysy 2022 jylǵy 29 qyrkúıek pen 2 qazan aralyǵynda Almatyda DMK VII jastar forýmyn ótkizýdiń mańyzyn atap ótti, onda jahandyq energetıkaǵa kóshý, dekarbonızatsııalaý jáne tómen kómirtekti damý máseleleri qaralady. Álemniń 29 elinen 700-den astam delegat qatysady. Óz kezeginde Pedro Mıras Qazaqstan Úkimetine atalǵan is-sharany ótkizýge jáne jalpy óńirdegi uıymnyń jumysyna qoldaý kórsetkeni úshin alǵys aıtty.
«Bizde kóptegen qyzyqty jobalar júzege asyrylyp jatyr. Atap aıtqanda, biz jas mamandarǵa búkil álemdegi bolashaq áriptesterimen salalyq baılanys ornatýǵa kómektesý úshin ýnıversıtettermen jumys isteımiz», — dedi Pedro Mıras.
Aıta ketsek, Dúnıejúzilik munaı keńesi – BUU janynda akkredıttelgen kommertsııalyq emes uıym, onyń maqsaty – munaı jáne gaz ónerkásibiniń negizgi máselelerin talqylaý úshin jaǵdaı jasaý. Uıymǵa 59 el múshe, olardyń úlesine álemdik munaı men gazdy óndirý jáne tutynýdyń 95%-dan astamy tıesili. Qazaqstan 2008 jyly DMK-nyń tolyq quqyqty múshesi boldy.