Qazaqstan komandasy robototehnıkadan álem chempıony atandy

<p>Qazaqstandyq oqýshylar Sıngapýrda ótken FIRST Global Challenge robototehnıkadan eń iri chempıonatta rekordtyq nátıjelerge qol jetkizdi. Osy jeńisi arqyly ulttyq qurama ótken jyly Jenevada alǵan chempıondyq ataǵyn taǵy bir márte rastady, dep habarlaıdy <a href="https://kaz.inform.kz/" target="_blank" rel="noopener">Kazinform </a>agenttigi.</p>

Qazaqstan qurama komandasynda Almaty qalasyndaǵy FMB NZM stýdentteri Nurıslam Turǵynbaı, Nursultan Janzaqov, Sergeı Gaponov, Dámeli Shaımerdenova jáne Imanáli Kóksal boldy. Ulttyq quramanyń bapkerleri - Bekzat Іńkárov pen Nurdáýlet Dosmaǵambet.

«Biz Sıngapýrǵa Qazaqstannyń túkpir-túkpirinen 200 oqýshynyń ishinen ulttyq kezeńde iriktelgen myqty komandany alyp keldik. Bizdiń komandanyń aldynda ótken jylǵy Jenevadaǵy tarıhı jeńisti qaıtalaý mindeti turdy jáne olar muny oıdaǵydaı oryndady, upaı sany boıynsha álemdik rekord ornatty. Budan basqa, komandamyz halyqaralyq yntymaqtastyq úshin tóreshilerdiń marapattaryna ıe boldy, bul biz úshin úlken maqtanysh. Qazaqstandaǵy robototehnıka jyl saıyn halyqaralyq brendke aınalyp keledi», - dep bólisti USTEM Foundation qoǵamdyq qorynyń jetekshisi Asylbek Myrzahmetov.

FIRST Global Challenge – jyl saıyn ártúrli elderde ótetin olımpıadalyq úlgidegi jahandyq robototehnıka chempıonaty. Osy jylǵy chempıonatqa álemniń túkpir-túkpirinen 190-nan astam el qatysty.

Eske salaıyq, Ulttyq qurama robototehnıka olımpıadasynyń irikteý kezeńderi sheńberinde QR Oqý-aǵartý mınıstrliginiń qoldaýymen jasaqtaldy.