Qazaqstan kóliktik operatsııalardy jedeldetýde óte durys qadam jasady - TEYK Bas hatshysy

ASTANA. QazAqparat - Túrkitildes  elderdiń yntymaqtastyq keńesiniń Bas hatshysy Ramıl Gasanov Transkaspıılik dálizdi damytýda Aqtaý portynyń mańyzdylyǵyna toqtalyp, Qazaqstannyń kóliktik operatsııalardy damytýda kúsh salyp jatqanyna joǵary baǵa berdi, dep habarlaıdy «QazAqparat» HAA tilshisi.

Bas hatshy bul týraly Astanada ótip jatqan H «TransEýrazııa-2017» kólik-tranzıttik áleýet jónindegi halyqaralyq konferentsııada «Transkaspıılik dáliz jáne kólik salasyndaǵy yntymaqtastyq» taqyrybyndaǵy baıandamasynda aıtyp berdi.
 

«Eýrazııa arqyly saýda-sattyq tasymalyn arttyrǵymyz keledi. Qytaıdyń «Bir beldeý - bir jol» jobasy baryn bilesizder. Ol Eýropa men Azııany baılanystyryp, ár túrli porttar arqyly Afrıkaǵa da jetýi múmkin», - deıdi Ramıl Gasanov.

Onyń aıtýynsha, Transkaspıılik dálizdi Eýropa men Azııa úshin ıntegratsııalyq ári arzan baǵadaǵy tasymal joly retinde qalyptastyrýdyń mańyzy zor.
 

«Sońǵy birneshe jylda Transkaspıılik dálizdiń damyp kele jatqanyn baqylap otyrmyz. Ázerbaıjan arqyly qosymsha shyǵyndar joıyldy. Baký porty zamanaýı ınfraqurylymmen kóliktik operatsııalardyń jyldamdyǵyn arttyryp otyr. Qazaqstanda da osyndaı damýdyń baryn baıqap otyrmyz. Aqtaý porty «Bir tereze» qaǵıdaty boıynsha atalǵan operatsııalardy jeńildete tústi. Osylaısha, Qazaqstanda kóliktik operatsııalar jedeldetilip, arzan bola tústi. Operatsııalyq qıynshylyqtardy eńserýde Qazaqstan birqatar jumys atqardy. Bul óte mańyzdy qadam. Atalǵan jumys Qazaqstannyń tranzıttik el retinde áleýetin arttyra túsedi», - deıdi Ramıl Gasanov.

Eske sala ketsek, búgin Astanada H «TransEýrazııa-2017» kólik-tranzıttik áleýet jónindegi halyqaralyq konferentsııasy bastaldy. Oǵan Latvııa, Lıtva, Túrkııa, Ázerbaıjan, Reseı, Belarýs elderinen 300-ge jýyq delegat qatysyp jatyr.