Qazaqstan kóktemgi sý tasqyny saldaryn ózgeniń kómeginsiz eńsere aldy – Prezıdent

<p>ASTANA. KAZINFORM &ndash; AES qurylysy boıynsha referendýmda daýys bergennen keıin BAQ ókilderimen suhbattasqan Memleket basshysy Qasym-Jomart Toqaevqa kóktemgi sý tasqyny jóninde saýal qoıyldy.&nbsp; &nbsp;</p>

«Bıyl kóktemde elimiz teńdessiz sý tasqynyna tap boldy jáne óńirlerdiń apatqa tolyqtaı daıyn emestigi bilindi. Osy oqıǵadan keıin qandaı da bir qorytyndy jasaldy ma?» - dep surady BAQ ókilderi Prezıdentten. 

Memleket basshysy mundaı tabıǵı apat tek elimizde ǵana emes, álemniń birqatar óńirinde bolǵanyna nazar aýdartty.

«Qorytyndy jasaldy. Degenmen, mundaı tabıǵı apat jer sharynyń barlyǵyn derlik sharpyǵanyna nazar aýdaryńyzdar. Taıaýda ǵana Ortalyq Eýropada alapat sý tasqyny oryn aldy. Oǵan deıin AQSh-ta óte qatty daýyl soqty, Vetnamda da boldy. Mundaı tabıǵı apatty boljaý óte qıyn, biraq biz oǵan daıynbyz jáne aldyn alý sharalaryn mindetti túrde qabyldaý qajet. Sondyqtan da sharalar qabyldandy. Baıqasańyzdar, Qazaqstan bul problemany ózgeniń kómeginsiz eńsere aldy. Biz qarjylyq da, adamı da resýrstardy shoǵyrlandyra aldyq. Úkimet pen ákimdikterdiń belsendi jumysynyń arqasynda barlyq saldaryn eńsere aldyq. Qalaı degende de, sý tasqyny kezinde zardap shekkender jańa baspana aldy. Men kómekten eshkim de tys qalmaıtyndyǵyna ýáde berdim jáne negizinen biz bul tapsyrmany oryndadyq», - dedi Qasym-Jomart Toqaev.

Buǵan deıin Qasym-Jomart Toqaev AES boıynsha referendýmda daýys bergenin jazǵan bolatynbyz.

BAQ ókilderimen shaǵyn suhaty barysynda Memleket basshysy Úkimet jumysyna baǵa berdi.

Sondaı-aq tilshiler suraǵyna oraı, ustazdardyń qoǵamdyq mártebesi mindetti túrde kóteriletinin aıtty.

Eske salsaq, Ortalyq referendým komıssııasy tóraǵasynyń orynbasary Konstantın Petrov eldiń barlyq óńirinde Qazaqstanda atom elektr stantsııasyn salý máselesi boıynsha jalpyulttyq referendým bastalǵanyn resmı málim etti.

1 shildedegi jaǵdaı boıynsha el kóleminde 12 176 968 adam referendýmda daýys berýge haqyly.