Qazaqstan klımattyń ózgerýimen kúreske blokcheın qoldanbaq

ASTANA. QazAqparat - Qazaqstan klımattyń ózgerýimen kúreske blokcheındi qoldaný múmkinshiligin zerdelep jatyr. Bul týraly búgin Global Challenges Summit 2018 forýmy aıasynda ótken Halyqaralyq jasyl tehnologııalar jáne ınvestıtsııalyq jobalar ortalyǵynyń tusaýkeser sharasynda Qazaqstan Ekologııalyq uıymdary qaýymdastyǵy tóralqasynyń tóraıymy Álııa Nazarbaeva aıtty, dep habarlaıdy QazAqparat tilshisi.

«Biz qolǵa alǵan fokýs Davosta ótken sońǵy Dúnıejúzilik ekonomıkalyq forým vektorlaryn sáıkestendiretin ekonomıkalyq, ekologııalyq jáne áleýmettik kórsetkishterdiń ózara baılanysyn pash etedi. Máselen, ıspandyq ǵalymdardyń Eýropanyń 119 qalasynda júrgizgen zertteýleri tabıǵatty qorǵaý sharalary tıimdi júrgizilgen jerlerde JІÓ ósimi jan basyna shaqqanda 20 paıyzdy quraǵandyǵyn kórsetti», - dedi ol.

Onyń atap ótýinshe, bul faktordy eskerý birneshe taqyryptyq baǵytty qamtıtyn ulttyq kórsetkishterge qol jetkizýge septigin tıgizedi. Atap aıtqanda,  Parıj kelisimi erejelerine negiz bolǵan normatıvtik-quqyqtyq bazalarǵa, baǵdarlamalyq qujattarǵa jáne ınstıtýttyq sharalarǵa saı keletin  atalǵan ázirleme EYDU elderiniń «jasyl ósim» kórsetkishterin engizý protsesine serpin beredi.

«Bizdiń qyzmetimizde tabıǵatty qorǵaý sharalaryna monıtorıng jasaýǵa, ekologııalyq ahýaldy ólsheý jáne baǵalaýǵa aıryqsha mańyz beriledi. Buǵan qosa, biz tsıfrlandyrý, klımattyń ózgerýimen kúresý úshin blokcheın-tehnologııalaryn paıdalaný máselelerine nazar aýdaramyz»,- dedi Álııa Nazarbaeva.