Qazaqstan Qytaımen óńirlik qoıma ınfraqurylymyn qurýdy talqylaıdy

<p>ASTANA. KAZINFORM &ndash; Aqtóbe men Aqtaýda salynatyn bond qoımalary sheteldik taýardy jetkizý ýaqytyn anaǵurlym qysqartady. Bul týraly Saýda jáne ıntegratsııa mınıstri Arman Shaqqalıev aıtyp berdi.</p>

«Elektrondyq saýdany damytý sharttarynyń biri – qoımalyq jáne logıstıkalyq ınfraqurylymnyń bolýy. 2024 jyldyń sońyna deıin transshekaralyq elektrondy saýdany yntalandyrý úshin Qytaı tarapymen birlesip, Qazaqstanda óńirlik qoıma ınfraqurylymyn qurý máselesin pysyqtaý josparlanýda», - dedi A. Shaqqalıev Úkimet otyrysynda.

Sonymen qatar, Aqtóbe jáne Aqtaý qalalarynda fýlfılment ortalyqtary men bond qoımalary jelisin damytý jalǵastyrylatyn bolady.

«Bond qoımalaryn ashý Qytaıdan Eýropaǵa jáne keri baǵytta taýarlardy odan ári tranzıtteý úshin iri sheteldik marketpleısterdiń taýarlaryn ornalastyrýǵa múmkindik beredi. Bul sheteldik taýarlardy qazaqstandyq satyp alýshylarǵa jetkizý ýaqytyn 60-tan 7 kúnge deıin qysqartýǵa múmkindik beredi», - dedi Saýda mınıstri.

Sondaı-aq, shaǵyn jáne orta bıznes sýbektilerine keshendi memlekettik qoldaý kórsetý maqsatynda «Atameken» ulttyq kásipkerlik palatasymen birlesip, barlyq óńirlerde elektrondyq saýdany oqytý ortalyqtary ashylady. Búginde mundaı oqytý ortalyqtary batys óńiriniń 4 oblysynda iske qosyldy. Onda kásipkerlerge marketpleısterde qalaı tirkelýdi, taýardy qalaı satýdy jáne logıstıkany qurý úıretiledi.