Qazaqstan Qytaıǵa mal sharýashylyǵy ónimderin qaıta eksporttaıdy
Kezdesýde Qazaqstan men Qytaı arasyndaǵy aýyl sharýashylyǵy ónimderiniń taýar aınalymyn arttyrý máseleleri talqylandy. Aıdarbek Saparovtyń aıtýynsha, eki memleket saýda yntymaqtastyǵyn damytýdyń, ásirese aýyl sharýashylyǵy saýdasynyń zor áleýetine ıe.
QR Aýyl sharýashylyǵy mınıstri sondaı-aq muzdatylǵan et, qus sharýashylyǵy ónimderi men malǵa, maıly jáne dándi daqyldarǵa qosymsha Qytaıǵa salqyndatylǵan sıyr eti men shoshqa etin jetkizýde respýblıkanyń múmkindigi mol ekenin atap ótti. Bul eki el arasyndaǵy taýar aınalymy kóleminiń edáýir ulǵaıýyna yqpal etedi. Bul úshin Aýyl sharýashylyǵy mınıstrligi janýarlar men qustardyń asa qaýipti aýrýlaryn boldyrmaý maqsatyndaǵy jumystardy el aýmaǵynda belsendi túrde jalǵastyrýda. Sondyqtan qytaılyq tarapqa qolaıly aımaqtardan et eksportyn bastaý usynyldy.
ıÝı Tszıanhýa myrza Aıdarbek Saparovqa táýekelderdi baǵalaýdyń jáne qazaqstandyq sıyr etin, shoshqa eti men qus etin jetkizýdi qaıta bastaý úshin shekteýlerdi alyp tastaýdyń sońǵy kezeńi jóninde aıtty. QHR Bas keden basqarmasy mamandarynyń Qazaqstanǵa sapary bıylǵy jeltoqsan aıyna josparlanǵan.
Qazaqstannyń veterınarlyq qyzmetti baǵalaý qorytyndysy boıynsha qytaı tarapy qoldanystaǵy shekteýlerdi alyp tastaý múmkindigin qarastyryp, Qytaıǵa mal sharýashylyǵy ónimderin eksporttaýdy qaıta bastaýǵa daıyn. Budan bólek yntymaqtastyqty odan ári damytý úshin ıÝı Tszıanhýa Aıdarbek Saparovty Qytaıǵa shaqyrdy.
Aıta keteıik, 27-qarashada Qazaqstan-Qytaı yntymaqtastyq komıtetiniń otyrysy aıasynda QR Aýyl sharýashylyǵy mınıstrligi men QHR Bas keden basqarmasy Qazaqstannan Qytaıǵa súıekti daqyldardyń (shabdaly jáne órik) eksporttyq partııalaryna qoıylatyn fıtosanıtarlyq talaptar jónindegi hattamaǵa qol qoıdy.
Esterińizge sala keteıik, 2023 jyldyń 10 aıynda QR men QHR arasyndaǵy AÓK salasyndaǵy ózara saýda kólemi 70%-ǵa ósip, 1 mlrd dollardan asty. Eksport 811,1 mln dollar, ımport 197,4 mln dollar bolǵan.