Qazaqstan Qytaı, Túrkııa jáne Eýropa elderine et eksporttaıdy – AShM vıtse-mınıstri
«Atameken» UKP sezdaldy jıyny kezinde Kazinform tilshisine Azat Sultanov et eksporttaý máselesine qatysty atqarylyp jatqan jumystar týraly aıtty.
«Etti eksporttaý úshin biz áýeli ishki naryqty qamtamasyz etýimiz kerek. Sodan artylǵanyn biz eksportqa shyǵaramyz. Bizdiń elimizdiń sharýalary ishki naryqty 96-100 paıyz kóleminde qamtı alady. Qazir eksportqa jaqyn turmyz. Bıyl Reseıge sıyr etin eksporttaýǵa jol ashyldy. Odan bólek, Eýropamen kelisimshart daıyn. Ol jaqqa jylqy etin jetkizemiz. Sondaı-aq, Aýyl sharýashylyǵy mınıstri Túrkııaǵa baryp, kelisim jasasyp keldi. Endi bizge Túrkııa naryǵy da ashylyp otyr. Qazir Túrkistan oblysyndaǵy mal bordaqylaýmen aınalysatyn «Qaıyp ata» sharýa qojalyǵy Túrkııaǵa sıyr etin eksporttaý boıynsha belsendi jumys júrgizip jatyr», - dedi vıtse-mınıstr.
Spıkerdiń aıtýynsha, elimiz buryn Qytaıǵa tek muzdatylǵan et eksporttaǵan. Endigi jerde jańa soıylǵan mal etin ushamen de jetkizý múmkin bolady.
«Qytaıǵa sıyr, jylqy jáne taýyq etin jetkizý kelisimshartyna qol qoıdyq. Ol buryn bolmaǵan», - dedi Azat Sultanov.
Sondaı-aq spıker Túrkııa naryǵy bizdiń elimizden et asyrýǵa 20 jyldaı jabyq bolǵanyn aıtty.
«Veterınarlyq kelisim bolǵan joq. Sosyn, Túrkııa da, Qytaı da ımporttaıtyn taýarlarǵa qıyn talaptar qoıady. Endi olardyń talaptaryn biz túgel oryndadyq. Kelisimsharttar jasaldy. Mınıstr Túrkııaǵa issaparmen barǵanda elimizdiń birqatar kompanııalarynyń ókilderi birge barǵan bolatyn. Solardyń ishinde joǵaryda atap ótken «Qaıyp ata» sharýa qojalyǵynyń basshysy Syrym Ertaev ta boldy», - dedi AShM basshysynyń orynbasary.
Aıta keteıik, buǵan deıin Azat Sultanov elimizdiń bazarlarynda ımporttalǵan et satylmaıtynyn aıtqan bolatyn.