Qazaqstan-Qytaı shekarasynda halyqaralyq saýda-logıstıkalyq ortalyǵy ashyldy

<p>ASTANA. KAZINFORM - Búgin Qazaqstan-Qytaı shekarasynda ornalasqan Dostyq aýylynyń mańynda jańa halyqaralyq saýda-logıstıkalyq ortalyq óz jumysyn bastady.</p>

Bul týraly QR Kólik mınıstrliginiń baspasóz qyzmeti málim etti.

Atalǵan jobany Dostyk Storage JShS Memlekettik kirister komıtetimen birlesip júzege asyrǵan bolatyn. Kózdelgen negizgi maqsat – transshekaralyq logıstıkalyq ınfraqurylymdy damytý jáne «Alakól» jol ótkeliniń ótkizý qabiletin arttyrý.

Foto: QR Kólik mınıstrligi

Buǵan deıin Qazaqstan Respýblıkasynyń Prezıdenti Qasym-Jomart Toqaev júk kólikteriniń Qazaqstan-Qytaı shekarasy arqyly ótýin jedeldetý týraly birneshe ret aıtqan bolatyn. Osylaısha, bıznes pen Úkimettiń birlese qatysýymen júkterdi ótkizý qabilettiligin arttyrý jáne ony rásimdeýdi jedeldetý sharalary júzege asyryldy.

Foto: QR Kólik mınıstrligi

«Júkterdi óńdeý jáne saqtaý úshin osyndaı ortalyqtar ashý Memleket basshysynyń tapsyrmasy sheńberinde júzege asyrylýda. Atalǵan ortalyq óz kezeginde shyǵys shekaramyzdaǵy alǵashqy ortalyq ári Dostyq – Shyǵys Qazaqstan men Eýropa shekarasyndaǵy eń ozyq bastama bolyp tabylady», - dedi keshenniń ashylý saltanatynda QR Kólik vıtse-mınıstri Maqsat Qalıaqparov.

Dostyk Storage qoımasynyń qurylysy qysqa merzimde júzege asyryldy. Jańa qoıma kesheni «Dostyq» kedeniniń «Alakól» keden beketiniń ótkizý qyzmetin táýligine 200-den 600 júk kóligine deıin arttyryp, táýliktik júk aınalymyn 4 myńnan 12 myń tonnaǵa deıin arttyrady dep kútilýde. Bul júk aınalymyn 1 mıllıon tonnadan 3 mıllıon tonnaǵa deıin arttyrady.

Foto: QR Kólik mınıstrligi

«Qazirgi tańda «Alakól» keden beketi arqyly bir baǵytta nebári 180 kólik ótedi. Bıyl bul beketti jańǵyrtý jumystaryn aıaqtap, júk aǵynyn 500 kólikke deıin ulǵaıtýdy kózdep otyrmyz»,- dedi QR Qarjy mınıstrligi Memlekettik kirister komıtetiniń tóraǵasy Jandos Dúısembıev.

Foto: QR Kólik mınıstrliginiń baspasóz qyzmeti

Aıta keterligi, Dostyk Storage JShS logıstıkalyq ortalyǵy 13,5 gektar aýmaqta ornalasqan. Onyń 3,5 gektaryn úı-jaılary men qoıma ınfraqurylymy alyp jatyr, al 10 gektary júk kólikterin qoıýǵa bólingen. Jobaǵa arnalǵan jeke ınvestıtsııa 2,8 mlrd teńgeden astam somany qurady. Keshen 3 jyldyq merzimge 100 paıyz quryltaıshysy Memlekettik kirister komıteti bolyp tabylatyn Nur Zholy customs services memlekettik kásipornynyń basqarýyna berildi.