Qazaqstan-Qytaı munaı qubyrynyń ótkizý múmkindigin ulǵaıtý sharalary qolǵa alyndy
«Taǵy bir másele, qolǵa alynǵan aýqymdy energetıkalyq jobalardy tıimdi júzege asyrý qajet. Qazir Qazaqstanda munaı-hımııa zaýyttary salynyp jatyr. Shymkenttegi munaı óńdeý zaýytyn jańǵyrtý jumystary júrgizilýde. Qazaqstan-Qytaı munaı qubyrynyń ótkizý múmkindigin ulǵaıtý sharalary qolǵa alyndy. Kóp uzamaı bul jobalar ekonomıkamyzǵa úles qosa bastaıdy. Sapar aıasynda Qazaq-qytaı iskerlik keńesiniń otyrysy ótti. Onda birqatar ınvestıtsııalyq kelisimge qol qoıdyq. Osy kommertsııalyq kelisimder ekonomıkalyq baılanysty nyǵaıtýǵa jol ashady. Biz kólik-logıstıka salasyndaǵy yqpaldastyqty jandandyrý qajettigine de nazar aýdardyq. Ásirese, Sı Tszınpın myrzanyń Astanada jarııalaǵan jahandyq «Bir beldeý, bir jol» bastamasy jáne Transkaspıı halyqaralyq kólik baǵdary aıasyndaǵy yntymaqtastyq máselelerin talqyladyq», - dedi Memleket basshysy.
Prezıdent byltyr temir jol arqyly tasymaldanatyn júk kólemi 22 paıyzǵa artyp, 28 mln tonnaǵa jetkenin aıtty.
«Bul – rekrodtyq kórsetkish. Lıanıýngan, «Qorǵas – Shyǵys qaqpasy» jáne Sıan qalasyndaǵy qurǵaq porttarda júzege asyrylǵan birlesken jobalardyń nátıjesinde kólik-logıstıkalyq áleýetimiz edáýir artty. Qazirgi tańda Aıagóz-Baqty úshinshi transshekaralyq temir jol qurylysy belsendi júrip jatyr. Búgin biz Traskaspıı halyqaralyq kólik baǵdary arqyly júk tasymalyn iske qosý is-sharasyna beınebaılanys rejıiminde qatystyq. Bul baǵdar Eýrazııa qurlyǵyndaǵy kólik-logıstıka qatynastaryn damytýǵa tyń serpin beredi», - dedi Qasym-Jomart Kemeluly.