Qazaqstan-Qytaı qarym-qatynasy damýdyń jańa altyn kezeńine ótti - Toqaev

<p>ASTANA. KAZINFORM &ndash; Qazaqstan-Qytaı qarym-qatynasy damýdyń jańa altyn kezeńine ótti. Bul týraly Aqordada elimizge memlekettik saparmen kelgen Qytaı Halyq Respýblıkasynyń Tóraǵasy Sı Tszınpınmen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.</p>

«Sizben elordamyz – Astanada júzdesip otyrǵanymyzǵa óte qýanyshtymyn. Siz búgin elimizge memlekettik saparmen kelip otyrsyz. Zor rızashylyǵymdy bildiremin. Bul eń aldymen Qazaqstan-Qytaı máńgilik jan-jaqty strategııalyq áriptestigin odan ary nyǵaıtýǵa degen umytylystyń aıqyn kórinisi dep baǵalaımyn. Qazaqstan elderimiz arasyndaǵy tatý kórshilik pen ǵasyrlar boıǵy dostyqtyqty nyǵaıtýǵa erekshe mán beredi. Biz birlesken kúsh-jigerimizdiń arqasynda ózgelerge úlgi bolatyn jáne túrli baǵytty qamtıtyn memleketaralyq yqpaldastyq ornattyq. Bizdiń ekijaqty qarym-qatynasymyz damýdyń jańa altyn kezeńine ótti dep aıtýǵa bolady», - dedi Qazaqstan Prezıdenti.

Memleket basshysy eki el arasyndaǵy baılanystar turaqty áleýmettik, ekonomıkalyq damýǵa, halyqtarymyzdyń ál-aýqatyn jaqsartýǵa zor septigin tıgizip otyrǵanyn basa aıtty.

«Byltyr ózara taýar aınalymy 41 mlrd dollardan asty. Bul – rekordtyq kórsetkish. Qazirgi tańda 45 ortaq ınvestıtsııalyq joba júzege asyrylyp jatyr. Onyń jalpy quny - 14,5 mlrd dollar. Jobalar ónerkásip, energetıka, kólik, tranzıt, jasyl ekonomıka, aýyl sharýashylyǵy jáne basqa da salalardy qamtıdy. Sonymen birge eki eldiń mádenı-gýmanıtarlyq baılanystary jandana tústi. Joǵary mártebeli Tóraǵa! Osy jetistikterdiń bári Sizdiń jeke qoldaýyńyzdyń arqasynda tabysty júzege asqanyn aıryqsha atap ótkim keledi», - dedi Qasym-Jomart Toqaev.