«Qazaqstan – Qytaı» forýmynda $629 mln-ǵa yntymaqtastyq týraly kelisimge qol qoıyldy
Osy iri dıalog alańynda Qazaqstan men Qytaı óńirleri arasyndaǵy saýda-ekonomıkalyq, kólik, ınvestıtsııalyq jáne mádenı-gýmanıtarlyq yntymaqtastyqtyń ózekti máseleleri talqylanady. Forýmǵa Qazaqstannyń 17 oblysynyń, iri kompanııalary men isker toptarynyń jáne QHR-dyń 27 óńiriniń ókilderi qatysty.
Serik Jumanǵarın is-sharanyń ashylýynda Qytaı Qazaqstanǵa ınvestıtsııa salý kólemi boıynsha tórtinshi orynda turǵanyn aıtty.
«Qazaqstan men Qytaı arasynda qarqyndy aımaqaralyq ózara is-qımyl jasaýǵa barlyq jaǵdaı jasalǵan. Sonymen birge ınvestıtsııalyq yntymaqtastyqtyń jańa múmkindikteri úshin úlken áleýet bar», - dedi vıtse-premer.
Forým aıasynda $629,1 mln-ǵa 17 qujatqa qol qoıyldy. Olardyń ishindegi eń irileri: Almaty oblysy men «TBEA» AAQ arasynda 10 qosalqy stansa men elektr jetkizý jelilerin salý jáne jańartý, elektr jabdyqtaryn óndirý zaýytyn salý týraly kelisimder, kúnbaǵys maıyn jetkizý boıynsha úsh kelisimshart, «Qazaq Camel» JShS men Xinjang Huaken Dairy Group Co ltd arasynda qurǵaq túıe sútin jetkizý týraly kelisimsharttar jáne basqalary bar.
Sol kúni Úrimshide «Ekspo Qytaı – Eýrazııa» halyqaralyq kórmesi óz jumysyn bastady. Bul naryqqa baǵyttalǵan segizinshi kásibı brend kórmesi. Onyń ashylýyna Ózbekstan men Qyrǵyzstan úkimetteriniń basshylary, Qazaqstan men Tájikstan Premer-Mınıstrleriniń orynbasarlary qatysty.
Serik Jumanǵarın kórmeniń ashylýyndaǵy alǵy sózinde Qytaı men Qazaqstan arasyndaǵy qarym-qatynastardyń «altyn 30 jyldyǵynyń» jańa paraǵy jańa ambıtsııalyq maqsattar qoıyp otyrǵanyn atap ótti. Olardyń biri – ózara taýar aınalymyn $100 mlrd deıin jetkizý.
260 sharshy metrlik qazaqstandyq pavılon «EKSPO Qytaı – Eýrazııa» kórmesinde qonaqtar pavılondary arasyndaǵy eń irisi boldy. Munda 42 otandyq kompanııanyń eksporttyq taýarlary ornalastyrylǵan. Bizdiń elimiz negizinen azyq-túlik ónimderin usyndy. Qazaqstandyq pavılonnyń uıymdastyrýshysy Qaztrade saýda saıasatyn damytý ortalyǵy boldy.
Anyqtama: «Ekspo Qytaı – Eýrazııa» kórmesi 2024 jylǵy 26-30 maýsym aralyǵynda ShUAA-nyń Úrimshi qalasynda ótedi. Ony Qytaıdyń Saýda mınıstrligi men Syrtqy ister mınıstrligi, Halyqaralyq saýdany damytýǵa járdemdesý komıteti jáne Shyńjań – Uıǵyr avtonomııalyq aýdanynyń Halyq úkimeti birlesip uıymdastyrady. Іs-sharanyń jalpy kórme alańy 140 000 sharshy metrdi quraıdy. Oǵan 50 elden, aımaqtardan jáne halyqaralyq uıymdardan, 30 provıntsııadan, avtonomdy aýdandardan jáne QHR mýnıtsıpalıtetterinen 1900 kompanııa men uıym qatysady.