Qazaqstan Kıprmen parlamentaralyq yntymaqtastyqty damytýǵa múddeli - Máýlen Áshimbaev
Senat Spıkeri óz sózinde Konstantınos Kombosty jáne barsha Kıpr halqyn osy eldiń Ulttyq kúnimen quttyqtady. Sondaı-aq ol Kıpr Qazaqstannyń Eýropadaǵy mańyzdy saıası jáne ekonomıkalyq seriktesteriniń biri ekenin tilge tıek etip, atalǵan memlekettiń joǵary qarqynmen damyp kele jatqanyna nazar aýdardy.
Máýlen Áshimbaev ótken jyldar ishinde Qazaqstan men Kıpr arasynda qurmet pen senimge negizdelgen ózara is-qımyldyń berik negizi qalyptasqanyn da atap ótti. Kezdesý kezinde eki eldiń parlamentaralyq qarym-qatynasyn odan ári jandandyrýdyń mańyzdy ekenine de basa mán berildi.
«Ózara senimge negizdelgen joǵary deńgeıdegi dıalog barlyq baǵyttaǵy baılanysymyzdyń artýyna zor yqpalyn tıgizdi. Biz Astanada Kıpr elshiligin ashý týraly sheshimdi quptaımyz. Mundaı qadam ekijaqty baılanystardy nyǵaıta otyryp, qarym-qatynasymyzdy jańa deńgeıge shyǵarady dep esepteımiz. Qazaqstan Parlamenti Kıprmen parlamentaralyq yntymaqtastyqty da damytýǵa múddeli. Bizdiń Parlamenttiń eki Palatasynda da Kıprdiń zań shyǵarýshy organymen dostyq toptary jumys isteıdi. Sol toptardyń áleýetin tıimdi paıdalaný mańyzdy», – dedi Máýlen Áshimbaev.
Sonymen qatar Senat Spıkeri Qazaqstanda Memleket basshysy Qasym-Jomart Toqaevtyń bastamasymen júrgizilip jatqan aýqymdy saıası jáne áleýmettik-ekonomıkalyq jańǵyrýlardyń nátıjelerine toqtalyp ótti. Sondaı-aq Konstantınos Kombosqa jańa ekonomıkalyq úlgige kóshý jolynda qolǵa alynǵan sharalar týraly da aıtyp berdi.
Óz kezeginde Kıprdiń Syrtqy ister mınıstri Qazaqstanda iske asyrylǵan qoǵamdyq-saıası ózgeristerdi joǵary baǵalady jáne eki el arasyndaǵy, onyń ishinde parlamentaralyq yntymaqtastyqty odan ári nyǵaıtýǵa múddeli ekenin jetkizdi.
Odan bólek, kezdesýde taraptar saýda-ekonomıkalyq, ınvestıtsııalyq jáne mádenı-gýmanıtarlyq baǵyttaǵy baılanystardy da arttyrý máselelerin talqylady.