Qazaqstan kıbersport federatsııasy Ulttyq Olımpıada komıtetiniń taný sertıfıkatyn aldy
Qazaqstan UOK bas hatshysy Andreı Krıýkov búgin Almatyda Qazaq Cybersport Federation prezıdenti Qýanyshbek Esekeevke sertıfıkatty tabys etti.
«Sporttyq federatsııalardy taný týraly sertıfıkat atalǵan sport túriniń Qazaqstandaǵy damýy zańdy ekenin dáledeıtin negizgi qujat. Osy oraıda, Qazaqstan Ulttyq Olımpıadalyq komıteti tek qana olımpıadalyq sport túrlerin ǵana emes, qarqyndy damyp, jastar arasynda tanymaldyqqa ıe bolǵan olımpıadalyq emes sport túrlerin de tanıdy. Bolashaqta elimizdegi e-sport jankúıerleriniń arasynda olımpıadalyq qundylyqtardy nasıhattaý úshin Ulttyq Olımpıadalyq komıtet pen kıbersport Federatsııasy birlesken jobalar jasaýy múmkin ekenin joqqa shyǵarmaımyz», - deıdi Andreı Krıýkov.
Aıta ketelik, ulttyq kıbersport federatsııasy 2017 jyldyń jeltoqsan aıynda kásibı jáne áýesqoı kıbersportshylar bastamasymen quryldy. Al 2018 jyldyń maýsymynda QR Mádenıet jáne sport mınıstrliginde akkredıtatsııadan ótti.
«Qazaqstanda elishilik qana emes, kıbersporttan halyqaralyq jarystardy da ótkize alatyn ózindik «kıberstadıon» quryldy dep senimmen aıtýǵa bolady. Bul joba ýaqyt ótken saıyn jetildirilip, tolyqtyrylý ústinde. Joba tek qana qazaqstandyq mamandardyń kómegimen qurylyp, modernızatsııalanýda. Bul bizdiń balalardyń qolymen jasalǵan, tolyǵymen otandyq ónim. Atalǵan joba qatysýshylarǵa ǵana emes, kórermenderge de qyzyq. Bizdiń arnalardaǵy translıatsııanyń jalpy qaralymy 10 mıllıonnan asyp ketti, al jalpy qamtý 3-6 mıllıon aralyǵyndaǵy biregeı lıdti quraıdy. Munyń ishinde BAQ betteri men translıatsııalar da bar», - deıdi Qazaqstan kıbersport federatsııasynyń prezıdenti Qýanyshbek Esekeev.
Federatsııany Ulttyq Olımpıada komıtetiniń tanýy «Dene shynyqtyrý jáne sport týraly» Qazaqstan Respýblıkasy Zańyna sáıkes Qazaqstan Respýblıkasy Mádenıet jáne sport mınıstrliginde salalyq akkredıtatsııalaýdan ótý protsedýrasynyń bir sharty. Federatsııaǵa sport túrin Qazaqstan aýmaǵynda damytý quzyrettiligi beriledi.
Osyǵan deıin QR UOK tarapynan taný sertıfıkaty olımpıadalyq jáne olımpıadalyq emes sport túrleri boıynsha 83 ulttyq sporttyq federatsııaǵa tabys etilgen.