Qazaqstan kıberqaýipsizdik salasyndaǵy jetistikterin bólisýge daıyn
Bishkekte ótip jatqan Eýrazııa ekonomıkalyq forýmnyń «Tsıfrlyq damý - tıimdi ıntegratsııanyń kilti» atty paneldik sessııasynda QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Ashat Orazbek sóz sóıledi.
«2020 jyly Qazaqstanda derbes derekterdi qorǵaý jónindegi ýákiletti organ aıqyndaldy. 2018 jyly «Qazaqstan kıberqalqany» baǵdarlamasy qolǵa alyndy. Ony iske asyrý nátıjesinde biz álem elderi arasynda 108-shi orynnan 31-shi orynǵa kóterildik. Sonymen qatar memlekettik jáne jeke derekterdi qorǵaýǵa arnalǵan birqatar quraldar qolǵa alyndy. Mysaly, derbes derekterdi baqylaý servısi iske qosyldy. Bul degenimiz sizdiń derbes derekterińizge qol jetkizgisi keletin memlekettik organdar nemese jeke uıymdar aldymen sizge suraý jiberedi. Siz smartfonnyń kómegimen jeke málimetińizdi paıdalanýǵa ruqsat beresiz nemese tyıym salasyz. Búginde bankter men keıbir operatorlar atalǵan ádispen jumys istep jatyr, - dedi A.Orazbek.
Sondaı-aq, vıtse-mınıstr memlekettik derekterdi qorǵaý úshin «qashyqtan jumys isteý orny» quraly týraly aıtty.
Onyń kómegimen memlekettik organdar qorǵalǵan kontýrda ornalasqan óz ınfraqurylymymen ınternetsiz jumys isteı alady.
Osy oraıda mınıstr orynbasary Qazaqstan osy jáne basqa da quraldardy Eýrazııa ekonomıkalyq odaq seriktes elderimen bólisýge daıyn ekenin málimdedi.
«Memlekettik jáne derbes derekterdi qorǵaýda Qazaqstan EAEO boıynsha áriptes elder arasynda ózara derek almasý kezinde qaýipsizdikti qamtamasyz etý úshin krıptografııamen bólisýge daıyn. Derbes derekterdi transshekaralyq almasý kezinde onyń qaýipsizdigin qorǵaý mańyzdy», - deıdi ol.
Onyń aıtýynsha, derekterdi qorǵaý salasyna keshendi ıntegratsııa qajet.
Buǵan deıin habarlaǵanymyzdaı Bishkekte alǵashqy Eýrazııa ekonomıkalyq forým ótip jatyr.
Atalǵan sharaǵa elimizden bir top delegatsııa bardy.