Qazaqstan Kedendik odaqta saýda básekelestigi jóninen utylyp jatyr degen pikir durys emes - vıtse-premer

ASTANA. QazAqparat - Eýrazııalyq ekonomıkalyq odaq Qazaqstannyń ekonomıkalyq múddelerine tolyqtaı saı keledi. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Premer-Mınıstriniń birinshi orynbasary Baqytjan Saǵyntaev málim etti.

«Máselen, Kedendik odaqqa engennen beri Qazaqstannyń óńdeýshi salasyna quıylǵan ınvestıtsııanyń kólemi eki esege artty. 2012 jyly onyń kólemi 3,4 mlrd. teńgege jetti, 2009 jyly ol 1,8 mlrd. teńge shamasynda tirkelgen. Sonymen qatar elimizge tartylǵan tikeleı shetel ınvestıtsııasynyń kólemi 34 paıyzǵa artyp, 28 mlrd. dollarǵa ósti. Bul Qazaqstannyń ınvestıtsııalyq tartymdylyǵyn arttyrdy», - dedi ol.

Onyń aıtýynsha, 2013 jyly Qazaqstannyń Reseı, Belarýs elderimen aradaǵy saýda aınalymy 24 mlrd. teńgeden asyp otyr.

«Osy turǵyda Qazaqstan saýda básekelestigi jóninen utylyp jatyr degen pikir durys emes. Mysaly, shokolad pen kondıterlik ónimderdiń saýdasy 3 esege, qazaqstandyq júk kólikteriniń Reseıge, Belarýsqa satylǵan sany 17 esege, tsement 16 esege artty. Osyndaı mysaldar az emes», - dep atap ótti B. Saǵyntaev.

Vıtse-premerdiń sózine qaraǵanda, Kedendik odaqqa engennen beri Qazaqstanda kólik, qara metall, plastmassa, rezeńke, qaǵaz óndirisiniń kólemi ósip otyr. Sondyqtan Eýrazııalyq ekonomıkalyq odaq Qazaqstan ekonomıkasy úshin úlken paıdasyn bermek.

Aıta keteıik, bıyl mamyr aıynda Astanada Qazaqstan, Reseı jáne Belarýs elderiniń basshylary EEO qurý týraly shartqa qol qoıady dep josparlanýda.