Qazaqstan KazSat spýtnıktik baılanysynyń arqasynda qomaqty qarjy únemdedi

ASTANA. QazAqparat - KazSat ǵaryshtyq spýtnıktik baılanysy qyzmetter ımportyn almastyrýda 34 mlrd teńgeden astam somany qamtamasyz etti. Bul týraly búgin QR QAÓM «Respýblıkalyq ǵaryshtyq baılanys ortalyǵy» AQ-nyń «Aqkól» ǵaryshtyq baılanys ortalyǵyna (ǴBO) Senat depýtattarynyń sapary kezinde málim boldy, dep habarlaıdy QazAqparat tilshisi.

Senattyń Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva bastaǵan depýtattar KazSat ǵaryshtyq baılanys jáne habar taratý júıesiniń jumysymen tanysty.

2018 jylǵy 1 qańtardaǵy jaǵdaı boıynsha, «KazSat» serııaly eki ǵarysh apparatynyń syıymdylyǵyn ortasha júkteý 70 paıyzdy qurady, bul álemdik tájirıbede jaqsy kórsetkish bolyp tabylady. Sebebi árbir ǵarysh apparatyn kommertsııalyq júkteý ádette barlyq resýrstyń 75-80 paıyzynan aspaıdy.

«Respýblıkalyq ǵaryshtyq baılanys ortalyǵy» AQ prezıdenti Vıktor Lefterdiń aıtýyna qaraǵanda,  KazSat ǵaryshtyq spýtnıktik baılanys (ǴSB) iske qosylǵaly qyzmetter ımportyn almastyrýda 34 mlrd teńgeden astam somaǵa qamtamasyz etti.

Qazirgi kúni «RǴBO» AQ qoldanystaǵy spýtnıktik baılanys jelileriniń úzdiksiz jumys jasaýy, sondaı-aq olardy odan ári damytý maqsatynda «KazSat» baılanys jáne habar taratý spýtnıkteriniń qazaqstandyq ulttyq toptamasyn kóbeıtý boıynsha belsendi jumys júrgizýde.

«Búgingi tańda Qazaqstanda memlekettiń bekitilgen baılanys arnalaryna qajettiligin tolyqtaı qanaǵattandyrýǵa qabiletti  tolyqqandy «KazSat» ǵaryshtyq baılanys júıesi quryldy», - dedi V. Lefter.

Aıta keteıik,  «Respýblıkalyq ǵaryshtyq baılanys ortalyǵy» AQ «KazSat» ǵaryshtyq baılanys júıesiniń ulttyq operatory. Sonymen qatar ortalyq 14 jyldan astam telekommýnıkatsııalyq operatorlardy, ulttyq kompanııalardy jáne holdıngterdi, memlekettik organdar men jeke uıymdardy tsıfrly teleradıo habar taratý, Internet jelisine keń jolaqty qoljetimdilik, derekterdi berý jáne korporatıvtik spýtnıktik baılanys jelileri qyzmetterimen qamtamasyz etedi.

«KazSat» ǴSB eki «KazSat-2» jáne «KazSat-3» baılanys jáne habar taratý apparattarynan turady.  «KazSat-2» ǵarysh apparaty 2011 jyly 16 shildede geostatsıonarlyq orbıtaǵa shyǵaryldy, al «KazSat-3» ǵarysh apparaty 2014 jyly 28 sáýirde ushyryldy. Eki spýtnık te bir-birinen qalyspaıdy, al keıbir tehnıkalyq parametrler boıynsha sheteldik ǵarysh apparattarynan asyp túsedi.

Spýtnıkterdi basqarý eki keshennen júrgiziledi. Atap aıtqanda, Aqmola oblysy Aqkól qalasyndaǵy jerústi basqarý kesheni, sondaı-aq Almaty oblysy Kókterek kentindegi rezervtik jerústi basqarý kesheni jasaqtalǵan.